ថៃ៖ ក្រុមឆត្រយោងថៃបានប្រើជំនាញពីលើអាកាសរបស់ខ្លួន ដើម្បីផ្តល់ជំនួយនៅតាមភូមិដែលរងគ្រោះដោយទឹកជំនន់ និងទម្លាក់ស្បៀងអាហារ និងរបស់ប្រើប្រាស់ចាំបាច់ដល់ប្រជាពលរដ្ឋដែលជាប់នៅខាងក្រោម។ ក្រុមការងារដែលមានគ្នា ១៥នាក់បានចាប់ផ្តើមប្រតិបត្តិការកាលពីថ្ងៃសៅរ៍សប្តាហ៍មុននៅខេត្ត Sukhothai ក្នុងប្រទេសថៃភាគខាងជើង បន្ទាប់ពីព្យុះត្រូពិក Dianmu និងភ្លៀងមូសុងប្រចាំឆ្នាំជន់លិចតំបន់នោះ។
ដោយប្រើម៉ាស៊ីនបញ្ជូនចំនួន ៥ឆត្រយោងនេះបានហោះជារៀងរាល់ថ្ងៃចាប់តាំងពីពេលនោះមក។ នៅស្រុកខ្លះនៃខេត្ត Sukhothai ស្ថានភាពទឹកហូរខ្លាំងដែលទូកតូចៗមិនអាចធ្វើដំណើរទៅមុខបាន។ ក្រុមឆត្រយោងផ្ទុកដោយសម្ភារៈសង្គ្រោះបន្ទាន់រហូតដល់ ២០កញ្ចប់ក្នុងម្នាក់ៗដើម្បីទម្លាក់ចែកជូនប្រជាពលរដ្ឋ។ កាលពីថ្ងៃពុធ ពួកគេបានទម្លាក់ប្រហែល ២០០កញ្ចប់។ ក្នុងកញ្ចប់ទាំងនោះមានទឹកសុទ្ធ មីកញ្ចប់ អង្ករមួយចំនួន និងអាហារស្ងួតផ្សេងទៀតដែលល្មមអាចជួយអ្នកភូមិបានប៉ុន្មានថ្ងៃទៅមុខទៀត ។ កញ្ចប់ខ្លះរួមមានទាំងថ្នាំពេទ្យ និងសំភារៈអនាម័យផងដែរ។
លោក Wichai Tiyasan វ័យ ៣៨ឆ្នាំម្នាក់ក្នុងចំណោមក្រុមការងារនេះបានប្រាប់ទីភ្នាក់ងារសារព័ត៌មាន AP ថា ការប្រើឆត្រយោងមានន័យថា ក្រុមអ្នកជួយសង្គ្រោះអាចទៅដល់តំបន់ពិបាកទៅដល់លឿនជាងមធ្យោបាយធ្វើដំណើរផ្សេងទៀត។ គួររម្លឹកថា ទឹកជំនន់ដ៏ធំកាលពីឆ្នាំ ២០១១ ដែលត្រូវបានចាត់ទុកថា គ្រោះធម្មជាតិដ៏ធ្ងន់ធ្ងរបំផុតរបស់ប្រទេសនេះក្នុងរយៈពេលកន្លះសតវត្សរ៍ បានសម្លាប់មនុស្សយ៉ាងហោចណាស់ ៦០០នាក់ និងបង្កការខូចខាតដែលស្មើនឹងទឹកប្រាក់ចំនួន ៤៥ពាន់លានដុល្លារ នេះបើយោងតាមការប៉ាន់ប្រមាណរបស់ធនាគារពិភពលោក៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
