​បាល់ទាត់៖ ​សារព័ត៌មាន​កីឡា​អេ​ស្ប៉ា​ញ​មួយចំនួន​បាន​ចុះផ្សាយ​ថា ក្លិប​បាល់ទាត់ Barcelona កំពុង​ពិចារណា​ពី​អនាគត​របស់អ្នកចាត់ការ​បច្ចុប្បន្ន​លោក Ronald Koeman ហើយ​បន្ទាប់ពី​ទំរង់​ធ្លាក់ចុះ​ចាប់ផ្តើម​មិនបាន​ល្អ​ទាំង​នៅ La Liga និង UEFA Champions League​។​

​​អតីត​ខ្សែបម្រើ Barcelona, Xavi Hernandez, អតីត​អ្នកចាត់ការ Juventus លោក Andrea Pirlo និង​អ្នកចាត់ការក្រុម​ជំរើសជាតិ​ប៊ែ​ល​ហ្ស៊ិ​ក​បច្ចុប្បន្ន​លោក Roberto Martinez សុទ្ធតែ​ស្ថិតក្នុង​បញ្ជី​បេក្ខភាព​ដែល​អាច​បន្ត​តំណែង​ពី​លោក Ronald Koeman​។​ ​​លោក Ronald Koeman ត្រូវបាន​គេ​សន្និដ្ឋាន​តំណែង​របស់លោក​នៅ​រឺក៏​ទៅ ​បន្ទាប់ពី​ការប្រកួត​ជាមួយ​ក្រុម​ការពារ​តំណែង​ជើងឯក Atletico Madrid នៅ​ទីក្រុង​ម៉ា​ឌ្រី​ត​ចុង​សប្តាហ៍​នេះ​។​

​​Barcelona បាន​រង​បរាជ័យ​យ៉ាង​អាម៉ាស​ ២​ប្រកួត​ជាប់​គ្នា​នៅ Champions League ដែល​រួមមាន​ចាញ់ Bayern Munich ក្នុង​ដី​ខ្លួនឯង ៣-០ និង​ទើប​ចាញ់ Benifca ៣-០ នៅ​ទឹកដី​ព័រទុយ​ហ្កាល់ ​ប្រឈម​ធ្លាក់​ត្រឹម​វគ្គ​វិលជុំ​ក្នុង​ពូ​ល​ជា​លើកដំបូង​តាំងពី​ឆ្នាំ២០០១​។​ ​​Benfica ជា​ក្រុម​ដែល Barcelona លេង​មិនដែល​ចាញ់​សោះ​តាំងពី​ឆ្នាំ១៩៦១​។​ ​ចំណែក​នៅ La Liga ឯណោះ​វិញ​ថ្វីបើ​មិនទាន់​ចាញ់ Barcelona កំពុង​ឈរ​លេខ៦ ក្នុង​តារាង​ក្រោយ​លេង​បាន ៦ប្រកួត​ឈ្នះ៣ ស្មើ៣៕

​អត្ថបទ​៖​នាង សុភា​វុ​ធ