ក្រុមជួយសង្គ្រោះមកពីប្រទេសជិតខាងរបស់បូស្នី និងបណ្តាប្រទេសសហភាពអឺរ៉ុប (EU) កាលពីថ្ងៃអាទិត្យ (ទី៦ ខែតុលា) បានចូលរួមកិច្ចខិតខំប្រឹងប្រែងសម្អាតកម្ទេចថ្ម និងស្វែងរកមនុស្ស ដែលនៅតែបាត់ខ្លួន ដោយសារទឹកជំនន់ និងបំណាក់ដីដែលបានបំផ្លិចបំផ្លាញផ្នែកខ្លះនៃប្រទេសបាល់កង់មួយនេះ។

បូស្នីបានស្វែងរកជំនួយពីសហភាពអឺរ៉ុប បន្ទាប់ពីព្យុះភ្លៀងធ្លាក់ខ្លាំងពេញមួយយប់ កាលពីថ្ងៃសុក្រសប្ដាហ៍កន្លងទៅ បានធ្វើឲ្យតំបន់ទាំងមូលជាច្រើនត្រូវជន់លិច ហើយកម្ទេចកម្ទី បានបង្កការខូចខាតដល់ផ្លូវថ្នល់ និងស្ពាន ដោយបានសម្លាប់មនុស្សយ៉ាងហោចណាស់ ១៨នាក់ និងរាប់សិបនាក់រងរបួស។

ប្រធានគណៈកម្មការសហភាពអឺរ៉ុប លោកស្រី Ursula von der Leyen បានឲ្យដឹងនៅលើបណ្ដាញសង្គម X ថា៖ «ពួកយើងបានចាប់ផ្ដើមដំណើរការយន្តការការពារជនស៊ីវិលរបស់ EU របស់យើង ហើយយើងកំពុងបញ្ជូនក្រុមសង្គ្រោះទៅកាន់កន្លែងរងគ្រោះ។ នេះជាសាមគ្គីភាពរបស់សហភាពអឺរ៉ុប»។

គួរបញ្ជាក់ថា ក្រុមមន្ត្រីបាននិយាយថា យ៉ាងហោចណាស់មនុស្ស ១០នាក់ នៅតែមិនទាន់ត្រូវបានដឹងពីជោគវាសនានៅឡើយទេ ដោយភាគច្រើននៃអ្នកទាំងនោះ ស្ថិតនៅក្នុងភូមិ Donja Jablanica ភាគខាងត្បូងបូស្នី ដែលស្ទើរតែត្រូវបានកប់នៅក្រោមថ្ម និងកម្ទេចថ្មពីកន្លែងយកថ្ម នៅភ្នំខាងលើ៕