ប្រភពពីគណបក្ស បានប្រាប់សារព័ត៌មាន AFP ថា សម្ព័ន្ធមិត្តជិតស្និទ្ធរបស់លោកស្រី Aung San Suu Kyi (អ៊ុង សាន សូជី) ដែលជាប្រមុខដឹកនាំប្រជាធិបតេយ្យ នៅសហភាពមីយ៉ាន់ម៉ា សា្លប់ដោយសារជំងឺមហារីកឈាម នៅថ្ងៃចន្ទ (ទី៧ ខែតុលា) នេះ ដោយមរណភាពនេះកើតមានប៉ុន្មានថ្ងៃបន្ទាប់ពីរូបលោកត្រូវបានដោះលែងពីការឃុំខ្លួនដោយរបបយោធា ដោយសារហេតុផលសុខភាព។

លោកបណ្ឌិត Zaw Myint Maung វ័យ ៧២ឆ្នាំ ដែលបានចំណាយពេលប្រហែល ២ទសវត្សរ៍ រស់នៅក្នុងពន្ធនាគារ ពីបទផ្គើននឹងបញ្ជារបស់របបយោធាមីយ៉ាន់ម៉ា គឺជាបុគ្គលដ៏ជិតស្និទ្ធរបស់លោកស្រី ស៊ូជី និងជាឥស្សរជនដ៏សំខាន់មួយរូបរបស់គណបក្សសម្ព័ន្ធជាតិ ដើម្បីលទ្ធិប្រជាធិបតេយ្យ (NLD)។

រូបលោកត្រូវបានចាប់ខ្លួនបន្ទាប់ពីមានរដ្ឋប្រហារចុងក្រោយរបស់យោធា ក្នុងឆ្នាំ២០២១ ហើយត្រូវបានដាក់ពន្ធនាគារពីបទពុករលួយ។ ថ្មីៗនេះ លោកត្រូវបានដោះលែងដោយហេតុផលសុខភាព។

ដោយសុំមិនបញ្ចេញឈ្មោះពេលនិយាយទៅកាន់ប្រព័ន្ធផ្សព្វផ្សាយ ប្រភពដែលជាសមាជិកជាន់ខ្ពស់របស់គណបក្ស បានប្រាប់សារព័ត៌មាន AFP ថា៖ «យើងទទួលបានការបញ្ជាក់ អំពីការស្លាប់របស់គាត់។ នេះជាការបាត់បង់ដ៏ធំមួយ សម្រាប់ពួកយើង ខណៈដែលគាត់ គឺជាអនុប្រធានគណបក្ស NLD របស់យើង»។

ប្រភពរូបនោះបានឲ្យដឹងថា លោកបណ្ឌិត Zaw Myint Maung បានទទួលមរណភាព ដោយសារជំងឺមហារីកឈាម។ ប្រភពបាននិយាយថា៖ «ទោះបីជាពួកយើងបានត្រៀមខ្លួនរួចជាស្រេចហើយថា យើងអាចបាត់បង់គាត់នៅថ្ងៃណាមួយក៏ដោយ ក៏យើងសោកស្តាយចំពោះការបាត់បង់គាត់ ក្នុងស្ថានភាពដ៏លំបាកនេះ។ តែយ៉ាងណាក្ដី យើងត្រូវតែដើរទៅមុខ ដើម្បីលទ្ធិប្រជាធិបតេយ្យ ជាមួយបណ្ដាមេដឹកនាំផ្សេងទៀត»៕