គ្រប់មណ្ឌលប្រឡងទូទាំងប្រទេស បានចាប់ផ្ដើមដំណើរការប្រឡងព្រមៗគ្នា ពុំមាន​ការ​រាំង​ស្ទះ​ឡើយ​ទោះ​បីជាសាលាខ្លះបានរងការជន់លិចដោយសារបញ្ហាភ្លៀងធ្លាក់ ខណៈដែល​ក្រសួង​អប់​រំ​បាន​ដោះ​ស្រាយ​រួចរាល់ និងដំណើរការជាធម្មតា។ នេះជាការលើកឡើងរបស់ឯកឧត្តម ឧបនាយក​រដ្ឋមន្ត្រី ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បញ្ជាក់ក្នុងឱកាស​ចុះ​ត្រួត​ពិនិត្យ កាត់វិញ្ញាសានៅ មណ្ឌលប្រឡងវិទ្យាល័យព្រះស៊ីសុវត្ថិនាព្រឹកថ្ងៃទី៨ ខែតុលានេះ។

ពិធីបើកប្រធានវិញ្ញាសាជានិមិត្តរូបក្នុងការប្រឡងសញ្ញាបត្រមធ្យមសិក្សាទុតិយភូមិ សម័យ​ប្រឡង​៖ ០៨ តុលា ២០២៤ នៅមណ្ឌលប្រឡង វិទ្យាល័យព្រះស៊ីសុវត្ថិនាព្រឹកនេះ បានធ្វើឡើង​ក្រោម​អធិបតីភាព ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួង​អប់រំ យុវជន និងកីឡា, ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និង​ជា​ប្រធានសហភាពសហព័ន្ធយុវជនកម្ពុជា, ឯកឧត្តម ប៉ា សុជាតិវង្ស ប្រធានគណកម្មការទី៧ នៃរដ្ឋសភា, ឯកឧត្តម ឃាង សេង ជាអនុប្រធានអង្គភាពប្រឆាំងអំពើពុករលួយ, និង ឯកឧត្តម កើត ឆែ អភិបាលស្តីទីនៃគណៈអភិបាលរាជធានីភ្នំពេញ។

ឯកឧត្តម ឧបនាយករដ្ឋមន្ត្រី ហង់ជួន ណារ៉ុន លើកឡើងថា ទោះបីជាមណ្ឌល​ប្រឡង​នៅ​តាម​ខេត្ត​ខ្លះ បានរងការជន់លិច ប៉ុន្ដែក្រសួង​បាន​សម្រេច​ធ្វើ​ការផ្លាស់ប្ដូរមណ្ឌលទៅរកមណ្ឌលដែលមានសុវត្ថិភាពរួចរាល់អស់ហើយ គឺមិនធ្វើឱ្យប៉ះពាល់ដល់ការប្រឡងឡើយ។ រីឯក្របខណ្ឌរាជធានីភ្នំពេញ អាជ្ញាធរក៏បានចូលរួមយ៉ាងសកម្ម ដោយបានចាក់ដីបំពេញដើម្បីដោះស្រាយនៅទីតាំងមណ្ឌលដែលមានការជន់លិចដោយសារជំនន់ទឹកភ្លៀងផងដែរ។

សម្រាប់ថ្ងៃដំបូង នៃការប្រឡងនេះដែរ បេក្ខជនដែលបានចូលទៅដល់ក្នុងមណ្ឌលប្រឡង វិទ្យាល័យព្រះស៊ីសុវត្ថិ លើកឡើងថា ពួកគេមានភាពជឿជាក់លើសមត្ថភាពរបស់ខ្លួន ក្នុងការប្រឡងនេះ ខណៈពួកគេបានត្រៀមខ្លួន និងការប្រឹងប្រែងរៀនសូត្រជាច្រើនឆ្នាំមកហើយត។ ពួកគេបានប្ដេជ្ញាប្រឡងឱ្យជាប់ ដើម្បីជាការតបស្នងដល់គុណបំណាច់អាណាព្យាបាល និងគុណបំណាច់របស់គ្រូបង្រៀនដែលបានខិតខំផ្ទេរចំណេះដឹងដល់ពួកគេ។

ការប្រឡង ដែលនឹងប្រព្រឹត្តិទៅនៅថ្ងៃទី ៨-៩ ខែតុលា ឆ្នាំ ២០២៤ គ្រប់បេក្ខជន ទាំងសិស្សថ្នាក់វិទ្យាសាស្ត្រ និងសិស្សថ្នាក់វិទ្យាសាស្ត្រសង្គម ត្រូវប្រឡងចំនួន ៧មុខវិជ្ជា។ សិស្សវិទ្យាសាស្ត្រ ត្រូវប្រឡងលើមុខវិជ្ជា ប្រវត្តិវិទ្យា ជីវវិទ្យា គីមី ភាសាបរទេស អក្សរសាស្ត្រខ្មែរ រូបវិទ្យា និងគណិតវិទ្យា។ រីឯសិស្សថ្នាក់វិទ្យាសាស្ត្រសង្គម ត្រូវប្រឡងលើមុខវិទ្យា ផែនដីនិងបរិស្ថានវិទ្យា ប្រវត្តិវិទ្យា ភូមិវិទ្យា ភាសាបរទេស គណិតវិទ្យា សីលធម៌ ពលរដ្ឋវិទ្យា និងអក្សរសាស្ត្រខ្មែរ។

សូមបញ្ជាក់ថា ការប្រឡងបាក់ឌុប ឆ្នាំសិក្សា២០២៣-២០២៤នេះ មានបេក្ខជនប្រឡងសរុប ១៣៧ ០៤០នាក់ ក្នុងនោះបេក្ខជនជ្រើសរើសថ្នាក់វិទ្យាសាស្ត្រសង្គមមានចំនួនប្រមាណ៧០ភាគរយ រីឯបេក្ខជ្រើសរើសថ្នាក់វិទ្យាសាស្ត្រមានត្រឹមតែប្រមាណ៣០ភាគរយប៉ុណ្ណោះ។ ចំពោះមណ្ឌលប្រឡងទូទាំងប្រទេស មានចំនួន ២៣០ មណ្ឌល ត្រូវជា ៥ ៥៣៣បន្ទប់៕ អត្ថបទ៖ គឹម ហុក