ទីភ្នាក់ងារសារព័ត៌មានរុស្ស៊ីបានរាយការណ៍នៅថ្ងៃអង្គារ (០៨ តុលា) នេះថា នាវាចម្បាំងរបស់កងទ័ពជើងទឹករុស្ស៊ី និងចិន បានអនុវត្តបេសកកម្មប្រឆាំងនាវាមុជទឹកនៅភាគពាយ័ព្យនៃមហាសមុទ្រប៉ាស៊ីហ្វិក ដែលជាផ្នែកមួយនៃសមយុទ្ធល្បាតរួមគ្នានៅក្នុងតំបន់អាស៊ីប៉ាស៊ីហ្វិក។

សារព័ត៌មាន អ៊ីធើហ្វាកស៍ (Interfax) បានដកស្រង់សេវាសារព័ត៌មាននៃកងនាវាចរប៉ាស៊ីហ្វិករុស្ស៊ីថា “ក្រុមតាកទិកនៃនាវាចម្បាំងបានធ្វើសមយុទ្ធ និងបង្កើតក្បួនយុទ្ធសាស្រ្ត ដើម្បីរៀបចំការហ្វឹកហ្វឺនការពារប្រឆាំងនឹងនាវាមុជទឹក”។

ទីភ្នាក់ងារនេះរាយការណ៍ថា នាវាកងទ័ពជើងទឹករុស្ស៊ី និងចិន បានចាប់ផ្តើមល្បាតរួមគ្នានេះឡើងបន្ទាប់ពីបានចូលរួមក្នុងសមយុទ្ធយោធាជើងទឹក “ប៉ីពូ/ទំនាក់ទំនង ២០២៤” (Beibu/Interaction 2024) កាលពីខែកញ្ញា។ Interfax បន្តថា វគ្គហ្វឹកហ្វឺន និងលំហាត់សមប្រយុទ្ធមួយចំនួនត្រូវបានគ្រោងទុកក្នុងអំឡុងពេលបេសកកម្មល្បាត រួមទាំងការរៀបចំការការពារប្រឆាំងនឹងនាវាមុជទឹក និងជួយសង្គ្រោះនៅសមុទ្រ។

ទីភ្នាក់ងារព័ត៌មានរុស្ស៊ីនេះមិនបានផ្តល់ពេលវេលាជាក់លាក់នៃសមយុទ្ធនោះទេ។ Interfax បានបន្ថែមថា ភាគីរុស្ស៊ី បានបញ្ជូននាវាពិឃាតប្រឆាំងនាវាមុជទឹកដ៏ធំពីរគ្រឿងពីកងនាវារបស់ខ្លួន ឈ្មោះថា ផេនតេលេយ៉េវ (Admiral Panteleyev) និង ទ្រីបូតស៍ (Admiral Tributs) ខណៈភាគីចិន ត្រូវបានតំណាងដោយនាវាពិឃាត ស៊ីនីង (Xining) និង អ៊ូស៊ី (Wuxi) នាវាចម្បាំង លីនអ៊ី (Linyi) និងនាវាផ្គត់ផ្គង់រួម ថៃហ៊ូ (Taihu)៕