លោកឧត្តមសេនីយ៍ទោ ស សំបូរធន មេបញ្ជាការរង និងជានាយសេនាធិការ កងរាជអាវុធហត្ថ​លើ​ផ្ទៃ​ប្រទេស នៅរសៀលថ្ងៃទី៨ ខែតុលា ឆ្នាំ២០២៤នេះ បានដឹកនាំកិច្ចប្រជុំ​ផ្សព្វ​ផ្សាយ​ផែន​ការ​ដើម្បី​ត្រៀមការពារសណ្តាប់ធ្នាប់ និងរក្សាសុវត្ថិភាពកម្មវិធីធំៗមួយចំនួននាពេលខាងមុខនេះ ដោយ​ក្នុង​នោះព្រះរាជពិធីអបអរសាទរខួបលើកទី២០ នៃការគ្រងព្រះបរមសិរីរាជសម្បត្តិ ព្រះករុណា​ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជា​ណា​ចក្រ​កម្ពុជា និងពិធីប្រកួតយុទ្ធគុនចម្រុះខ្មែរបុរាណ «ពានរង្វាន់សម្តេចធិបតី»ជាដើម។

កងរាជអាវុធហត្ថលើផ្ទៃប្រទេស បានត្រៀមកម្លាំងរួចជាស្រេច ក្នុងកិច្ចការពារសន្តិសុខ សណ្តាប់​ធ្នាប់ ចំពោះកម្មពិធីប្រកួតយុទ្ធគុនចម្រុះខ្មែរបុរាណ «ពានរង្វាន់សម្តេចធិបតី» ដែល​នឹង​ប្រព្រឹត្ត​ទៅ​នា​ថ្ងៃ​ទី១៦ដល់ថ្ងៃទី២០ ខែតុលា ឆ្នាំ២០២៤ខាងមុខនេះនៅពហុកីឡដ្ឋានជាតិ អូឡាំពិក។ ពិធីនេះនឹងប្រព្រឹត្តិទៅក្រោមអធិបតីភាពសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី​នៃ​ព្រះរាជា​ណា​ចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ព្រមទាំងមានការ​អញ្ជើញ​ចូល​រួមពីថ្នាក់ដឹកនាំជាន់ខ្ពស់រាជរដ្ឋាភិបាល បណ្ដាអង្គទូតនៃប្រទេសជាមិត្ត ភ្ញៀវ​កិត្តិយស​ជាតិ និងអន្តរជាតិផងដែរ។

កងរាជអាវុធហត្ថលើផ្ទៃប្រទេសក៏បាន ត្រៀមកម្លាំងរួចរាល់ផងដែរ ដើម្បីថែរក្សា ការពារនូវ សន្តិសុខ សណ្តាប់ធ្នាប់ សម្រាប់ព្រះរាជពិធីអបអរសាទរខួបលើកទី២០ នៃការគ្រង​ព្រះបរម​សិរី​រាជ​សម្បត្តិ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃ​ព្រះរាជា​ណា​ចក្រកម្ពុជា នឹងប្រព្រឹត្តិទៅពីថ្ងៃទី២៨-៣០ ខែតុលា ឆ្នាំ២០២៤ នៅក្នុង​ព្រះ​ទីនាំង​ទេវា​វិនិច្ឆ័យ និងនៅសួនមុខព្រះបរមរាជវាំង ស្ថិតនៅក្នុងភូមិសាស្ត្រ ភូមិ១១ សង្កាត់ជ័យជំនះ ខណ្ឌ​ដូនពេញ រាជធានីភ្នំពេញ។ ព្រះរាជពិធីនេះនឹងប្រព្រឹត្តទៅក្រោមព្រះរាជាធិបតីភាពដ៏ខ្ពង់ខ្ពស់បំផុតរបស់ព្រះករុណាព្រះបាទសម្តេច​ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរព​សក្ការៈ​ដ៏​ខ្ពង់ខ្ពស់បំផុត ព្រមទាំងមានការយាង និងអញ្ជើញចូលរួមពីព្រះរាជវង្សានុវង្ស ថ្នាក់ដឹកនាំ​ព្រឹទ្ធ​សភា រដ្ឋសភា ប្រមុខរាជរដ្ឋាភិបាល ថ្នាក់ដឹកនាំជាន់ខ្ពស់រាជរដ្ឋាភិបាល បណ្ដាអង្គទូត​នៃ​ប្រទេស​ជាមិត្ត ភ្ញៀវកិត្តិយសជាតិ និងអន្តរជាតិផងដែរ។

នៅក្នុងកិច្ចប្រជុំលោកឧត្តមសេនីយ៍ទោ ស សំបូរធន ក៏បានឲ្យដឹងផងដែរថា កងរាជ​អាវុធ​ហត្ថ​ដែល​ជា​ផ្នែក​មួយរបស់កងយោធពលខេមរភូមិន្ទ ក៏បានបញ្ជូនកម្លាំងចំនួន ៣ផែនស្មើ​នឹង​៣៣០​នាក់​ ដើម្បីចូលរួមឈរផែននៅមុខព្រះបរមរាជវាំង ក្នុងព្រះរាជពិធីអបអរសាទរខួបលើកទី២០ នៃ​ការ​គ្រង​ព្រះបរមសិរីរាជសម្បត្តិ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នៅថ្ងៃទី៣០ ខែតុលា ឆ្នាំ២០២៤នេះផងដែរ៕ អត្ថបទ៖ បាន ចក់