អគ្គលេខាធិការអង្គការសហប្រជាជាតិ លោក Antonio Guterres បាននិយាយ កាលពីថ្ងៃអង្គារ ទី៨ ខែតុលា ថា ពង្រាងច្បាប់របស់អ៊ីស្រាអែល ដែលនឹងបញ្ឈប់ទីភ្នាក់ងាររបស់អង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន បម្រើការនៅតំបន់ហ្កាហ្សាស្ទ្រីប និងWest Bank នឹងក្លាយជា «មហន្តរាយ» ប្រសិនបើត្រូវបានអនុម័ត។ 

លោកបានលើកឡើងពីក្តីបារម្ភរបស់លោក ជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu។

លោកបានប្រាប់អ្នកសារព័ត៌មានថា «វិធានការបែបនេះ នឹងរារាំងដល់កិច្ចខិតខំប្រឹងប្រែងដើម្បីកាត់ បន្ថយការលំបាករបស់ប្រជាជន និងភាពតានតឹងនៅក្នុងតំបន់ហ្កាហ្សា ហើយជាការពិត គឺនៅដែនដីប៉ាឡេស្ទីនទាំងមូល ដែលវានឹងក្លាយជាមហន្តរាយមិនអាចកាត់បន្ថយបាន។

សភាប្រទេសអ៊ីស្រាអែល កាលពីខែកក្កដា បានផ្តល់ការអនុម័តបឋមចំពោះសេចក្តីស្នើច្បាប់មួយដែលនឹងប្រកាសថាទីភ្នាក់ងារ UNRWA ជាអង្គការភេរវកម្ម។ មេដឹកនាំ អ៊ីស្រាអែលបានចោទប្រកាន់បុគ្គលិកទីភ្នាក់ងារ UNRWA ថាបានសហការជាមួយក្រុមសកម្មប្រយុទ្ធហាម៉ាស នៅក្នុងតំបន់ហ្កាហ្សា។

ទីភ្នាក់ងារUNRWA ផ្តល់ការអប់រំ សុខភាព និងជំនួយ ដល់ពលរដ្ឋប៉ាឡេស្ទីនរាប់លាននាក់នៅតំបន់ហ្កាហ្សា តំបន់West Bank ប្រទេសហ្ស៊កដានី លីបង់ និងនៅប្រទេសស៊ីរី។ ទីភ្នាក់ងារនេះ មានទំនាក់ទំនងដ៏តានតឹងជាមួយអ៊ីស្រាអែលជាយូរមកហើយ ប៉ុន្តែទំនាក់ទំនងកាន់តែធ្លាក់យ៉ាប់យ៉ឺនខ្លាំងចាប់តាំងពីការចាប់ផ្តើមសង្រ្គាមនៅតំបន់ហ្កាហ្សា ហើយអ៊ីស្រាអែលបានអំពាវនាវដដែលៗឱ្យទីភ្នាក់ងារ UNRWA ត្រូវបានរំសាយ។