ប្រព័ន្ធផ្សព្វផ្សាយរដ្ឋ KCNA បានរាយការណ៍ថា កងទ័ពកូរ៉េខាងជើង បាននិយាយថា ខ្លួននឹងកាត់ផ្ដាច់បណ្ដាញផ្លូវថ្នល់ និងផ្លូវដែកទាំងស្រុងដែលតភ្ជាប់ទៅកូរ៉េខាងត្បូង ចាប់ពីថ្ងៃពុធ (០៩ តុលា) នេះតទៅ ហើយនិងពង្រឹងរបាំងការពារនៅតំបន់ខាងព្រំដែនរបស់ខ្លួន។

សេចក្តីប្រកាសនេះបានបង្ហាញពីកំណើនភាពតានតឹងបន្ថែមទៀតនៃសកម្មភាពនៅជិតខ្សែបន្ទាត់កំណត់ព្រំដែនខណ្ឌចែកកូរ៉េទាំងពីរ ដែលកម្រកើតមានក្នុងប៉ុន្មានឆ្នាំចុងក្រោយ រហូតដល់ឆ្នាំនេះ។

យោធាកូរ៉េខាងត្បូង បាននិយាយកាលពីខែកក្កដាថា កូរ៉េខាងជើង បាននឹងកំពុងដាក់គ្រាប់មីន និងដំឡើងរបាំងការពារ និងបង្កើតដីសំណល់នៅតាមព្រំដែនដែលមានយោធាយ៉ាងច្រើនអស់រយៈពេលជាច្រើនខែក្នុងឆ្នាំនេះ បើទោះបីជាមានឧប្បត្តិហេតុផ្ទុះស្លាប់ទាហានខ្លួនក៏ដោយ។

អគ្គសេនាធិការនៃកងទ័ពប្រជាជនកូរ៉េរបស់ទីក្រុងព្យុងយ៉ាង បាននិយាយនៅក្នុងសេចក្តីថ្លែងការណ៍មួយដែលរាយការណ៍ដោយ KCNA ថា ជំហាននេះគឺជាការឆ្លើយតបទៅនឹងសមយុទ្ធសង្រ្គាមដែលបានធ្វើឡើងនៅកូរ៉េខាងត្បូង ដែលខ្លួនហៅថាជា “រដ្ឋអរិភាពចម្បង និងជាសត្រូវទីមួយដែលមិនអាចផ្លាស់ប្តូរបាន” ក៏ដូចជាដំណើរទស្សនកិច្ចជាញឹកញាប់ដោយក្រុមនុយក្លេអ៊ែរយុទ្ធសាស្ត្ររបស់សហរដ្ឋអាមេរិក នៅក្នុងតំបន់៕