រ៉ូម៉ានី៖ អាជ្ញាធរបាននិយាយកាលពីថ្ងៃសុក្រថា អគ្គិភ័យនៅមន្ទីរពេទ្យមួយនៅទីក្រុងកំពង់ផែ Constanta ប្រទេសរ៉ូម៉ានីបានសម្លាប់អ្នកជំងឺ COVID-19 យ៉ាងតិច ៧នាក់។ ប្រធានផ្នែកសង្គ្រោះបន្ទាន់នៃទីក្រុងបាននិយាយថា ជនរងគ្រោះទាំងអស់ស្ថិតនៅក្នុងបន្ទប់សង្គ្រោះបន្ទាន់នៃមន្ទីរពេទ្យក្រុង Constanta ដើម្បីព្យាបាលជំងឺឆ្លង។
រដ្ឋមន្ត្រីក្រសួងមហាផ្ទៃ លោក Lucian Bode បាននិយាយនៅថ្ងៃសុក្រថា តួលេខផ្លូវការដំបូងនៃអ្នកស្លាប់មានដល់ ៩នាក់ដែលត្រូវបានរាយការណ៍ខុស។ លោកនិយាយថា យើងកំពុងនិយាយអំពីមនុស្សស្លាប់ ៧នាក់ ដែល ៥នាក់ស្លាប់នៅក្នុងមន្ទីរពេទ្យ និង ២នាក់បានស្លាប់បន្ទាប់ពីត្រូវបានបញ្ជូនទៅមន្ទីរពេទ្យមួយផ្សេងទៀត។ ក្រសួងសុខាភិបាលបាននិយាយនៅក្នុងសេចក្ដីថ្លែងការណ៍ថា អ្នកជំងឺ ១១៣នាក់ស្ថិតនៅក្នុងមន្ទីរពេទ្យ ហើយអ្នកដែលនៅរស់ទាំងអស់ត្រូវបានជម្លៀសចេញ។ អគ្គិភ័យត្រូវបានពន្លត់ទាំងកណ្តាលយប់ ប៉ុន្តែមូលហេតុបង្កអគ្គិភ័យនៅមិនទាន់ដឹងនៅឡើយ។ ប្រទេសរ៉ូម៉ានីមានករណីឆ្លងវីរុស COVID-19 សរុប ១,២៤៤,៥៥ករណី និងមានអ្នកស្លាប់ ៣៧,២១០នាក់៕
អត្ថបទ៖ ប៊ុន ថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
