របាយការណ៍មួយរបស់អង្គការឃ្លាំមើលសិទ្ធិមនុស្ស HRW បានព្រមាននៅថ្ងៃពុធ (០៩ តុលា) នេះថា ក្រុមជនអន្ធពាលប្រដាប់អាវុធរបស់ប្រទេសហៃទី កំពុងជ្រើសរើសកុមារកាន់តែច្រើនឡើងនៅក្នុងជួរកងកម្លាំងរបស់ពួកគេ ខណៈស្ថានភាពជិតឈានដល់គ្រោះទុរ្ភិក្ស ជំរុញឱ្យក្មេងប្រុសបង្ខំចិត្តកាន់កាំភ្លើង ខណៈក្មេងស្រីត្រូវបានរំលោភបំពានផ្លូវភេទ និងបង្ខំឱ្យធ្វើការងារផ្ទះ។

HRW ដែលជាក្រុមតស៊ូមតិសិទ្ធិមនុស្សសកលមួយនេះរាយការណ៍ថា ខ្លួនបាននិយាយទៅកាន់កុមារចំនួន ៦នាក់ កាលពីពេលថ្មីៗនេះពាក់ព័ន្ធនឹងក្រុមជនអន្ធពាល ដែលកុមារទាំងអស់នោះនិយាយថា ពួកគេចង់ចាកចេញពីវិបត្តិ ហើយចូលរួមក្រុមប្រយុទ្ធដោយសារតែពួកគេស្រេកឃ្លាន ហើយថាក្រុមប្រដាប់អាវុធទាំងនោះជាប្រភពអាហារ ទីជម្រក ឬប្រាក់កាក់តែមួយគត់។

HRW បាននិយាយថា ក្មេងប្រុសជាញឹកញាប់ត្រូវបានគេប្រើជាអ្នកផ្តល់ព័ត៌មាន ហ្វឹកហាត់ឱ្យប្រើអាវុធ និងគ្រាប់រំសេវ ហើយត្រូវបានបញ្ជូនទៅក្នុងការប៉ះទង្គិចប្រឆាំងនឹងនគរបាល។ របាយការណ៍ បន្តថា ក្មេងស្រីត្រូវបានរំលោភ និងបង្ខំឱ្យធ្វើការងារផ្ទះសម្រាប់សមាជិកក្រុមជនអន្ធពាល ហើយជារឿយៗត្រូវបានបោះបង់ចោលនៅពេលដែលពួកគេមានផ្ទៃពោះ។ យោងតាមការប៉ាន់ស្មានដោយអង្គការសហប្រជាជាតិ បង្ហាញថា ប្រហែលមួយភាគបីនៃសមាជិកក្រុមជនអន្ធពាលគឺជាកុមារ។

ក្រុមប្រដាប់អាវុធដ៏មានឥទ្ធិពលរបស់ហៃទី បាននិងកំពុងពង្រីកអំណាចរបស់ពួកគេក្នុងប៉ុន្មានឆ្នាំថ្មីៗនេះ ខណៈស្ថាប័នរដ្ឋមិនដំណើរការដោយសារកង្វះមូលនិធិ និងវិបត្តិនយោបាយ។ ឥឡូវនេះ ក្រុមជនអន្ធពាលទាំងនោះគ្រប់គ្រងលើទឹកដី ដែលមានមនុស្ស ២,៧លាននាក់រស់នៅ ហើយក្នុងនោះមានកុមារកន្លះលាននាក់៕