ទីក្រុងតេអេរ៉ង់ បានប្រាប់រដ្ឋឈូងសមុទ្រថា ខ្លួននឹងមិនអាចទទួលយកបាននោះទេ ប្រសិនបើពួកគេអនុញ្ញាតឲ្យមានការប្រើប្រាស់ដែនអាកាសរបស់ពួកគេប្រឆាំងនឹងប្រទេសអ៊ីរ៉ង់ ហើយចំណាត់ការបែបនេះនឹងនាំឲ្យមានការឆ្លើយតប។ នេះជាការលើកឡើងរបស់មន្ត្រីជាន់ខ្ពស់អ៊ីរ៉ង់ កាលពីថ្ងៃអង្គារ (ទី៨ ខែតុលា) ចំពេលមានការព្រួយបារម្ភ អំពីការសងសឹករបស់អ៊ីស្រាអែល ចំពោះការវាយប្រហារដោយមីស៊ីលរបស់អ៊ីរ៉ង់ កាលពីសប្តាហ៍មុន។

មន្ត្រីរូបនេះ កំពុងនិយាយខណៈរដ្ឋមន្ត្រីការបរទេសអ៊ីរ៉ង់ លោក Abbas Araqchi បានធ្វើដំណើរទៅកាន់ប្រទេសអារ៉ាប៊ីសាអ៊ូឌីត និងរដ្ឋឈូងសមុទ្រផ្សេងទៀត ដើម្បីពិភាក្សាពីបញ្ហាផ្សេងៗ។

ការអត្ថាធិប្បាយបែបនេះក៏បានកើតមានឡើងផងដែរបន្ទាប់ពីមានការពិភាក្សា រវាងអ៊ីរ៉ង់ និងបណ្ដារដ្ឋធានីឈូងសមុទ្រពែក្ស កាលពីសប្តាហ៍មុន នៅខាងក្រៅសន្និសីទអាស៊ី ក្នុងប្រទេសកាតា នៅពេលដែលរដ្ឋឈូងសមុទ្របានព្យាយាមផ្ដល់ការធានាឡើងវិញនូវអព្យាក្រឹតភាពរបស់ពួកគេដល់អ៊ីរ៉ង់ នៅក្នុងជម្លោះណាមួយ រវាងទីក្រុងតេអេរ៉ង់ និងអ៊ីស្រាអែល។

មន្ត្រីជាន់ខ្ពស់រូបនោះ បានប្រាប់សារព័ត៌មាន Reuters ថា៖ «អ៊ីរ៉ង់បានបញ្ជាក់យ៉ាងច្បាស់ថា រាល់ចំណាត់ការរបស់ប្រទេសឈូងសមុទ្រពែក្សប្រឆាំងនឹងទីក្រុងតេអេរ៉ង់ មិនថា តាមរយៈការប្រើប្រាស់ដែនអាកាស ឬមូលដ្ឋានយោធា នឹងត្រូវបានចាត់ទុកដោយទីក្រុងតេអេរ៉ង់ថា ជាសកម្មភាពដែលធ្វើឡើងដោយក្រុមទាំងមូល ហើយទីក្រុងតេអេរ៉ង់នឹងឆ្លើយតបទៅតាមនោះ»៕