ភ្នំពេញ ៖ អភិបាលខណ្ឌច្បារអំពៅ លោកចេង មុនីរ៉ា បានប្រជុំដាក់ផែនការ និងធ្វើការណែនាំបន្ថែម ដល់កម្លាំងគណះបញ្ជាការឯកភាពរដ្ឋបាលខណ្ឌច្បារអំពៅទូទាំងមូលដ្ឋាន ត្រូវបងន្តពង្រឹង និងយកចិត្តទុកដាក់បន្ថែមទៀត លើកិច្ចការងារសន្តិសុខ ដែលជាការងារចម្បងត្រូវការពារ និងថែរក្សាឱ្យខាងតែបានដាច់ខាតជូនពលរដ្ឋ និងសង្គមជាតិ ។ 

ការដាក់ផែនការណ៍ ក៏ដូចជាការក្រើនរំលឹករបស់លោកអភិបាលខណ្ឌ ថ្លែងឡើងនៅក្នុងកិច្ចប្រជុំគណះបញ្ជាការឯកភាពរដ្ឋបាលខណ្ឌច្បារអំពៅ នារសៀលថ្ងៃទី០៩ ខែតុលា ឆ្នាំ២០២៤នេះ ដោយមានការចូលរួមពីលោកលោកស្រីជាអភិបាលរងខណ្ឌ លោកអធិការនគរបាល លោកមេបញ្ជាការមូលដ្ឋានកងរាជអាវុធហត្ថ និងលោកលោកស្រីចៅសង្កាត់ និងនាយប៉ុស្តិ៍រដ្ឋបាលនគរបាលទាំង០៨ នៅក្នុងមូលដ្ឋានផងដែរ ។

លោកអភិបាលខណ្ឌបានដាក់ចេញនូវិធានការដែលត្រូវអនុវត្តរួមមាន ៖ 

 ទី១,ពង្រឹងនូវការអនុវត្តគោលនយោបាយភូមិសង្កាត់ មានសុវត្ថិភាពឱ្យកាន់តែមានប្រសិទ្ធភាព ជាពិសេសលើការងារផ្តល់សេវាសាធារណៈ ធ្វើឱ្យបាន ធ្វើឱ្យលឿន និងមានតម្លាភាព និង វិធានការបង្ការទប់ស្កាត់ ល្បែងស៉ីសងគ្រប់ប្រភេទ , សកម្មក្មេងទំនើង , គ្រឿងញៀន ។ល។ 

ទី២ ,សង្កាត់នីមួយៗត្រូវពង្រឹងវេនយាមប្រចាំការនិងដឹកនាំកម្លាំងល្បាតក្នុងមូលដ្ឋានដើម្បីងាយស្រួល និងដោះស្រាយបានទាន់ពេលវេលានូវហេតុការណ៍ផ្សេងៗដែលអាចកើតមានឡើងជាយថាហេតុជាពិសេសនៅពេលយប់។

ទី៣ , សង្កាត់នីមួយៗត្រូវត្រៀមដោះស្រាយនូវការលិចលង់ដោយទឹកភ្លៀង។ ករណីសង្កាត់មិនមានលទ្ធភាពឬដោះស្រាយមិនបាន ត្រូវរាយការណ៍មកសាលាខណ្ឌបន្ទាន់ ដើម្បីយើងអាចជួយពួកគាត់បានទាន់ពេលវេលា។

ទី៤, លោកអភិបាលរងទទួលបន្ទុក ត្រូវបន្តដឹកនាំការរៀបចំសណ្តាប់ធ្នាប់សាធារណៈ និងដឹកនាំការងារដោះស្រាយការកកស្ទះចរាចរណ៍ក្នុងមូលដ្ឋាន និង

ទី៥. លោក លោកស្រីអភិបាលរងទទួលបន្ទុក ត្រូវពង្រឹងការងារគ្រប់គ្រងជនបរទេសក្នុងដែនសមត្ថកិច្ចរបស់យើង ៕ លីហេង