ក្រសួងការបរទេសរុស្ស៊ី នៅថ្ងៃពុធ (ទី៩ ខែតុលា) នេះ បាននិយាយថា ក្រុមហេសបូឡា នៅតែត្រូវបានរៀបចំរចនាសម្ព័ន្ធ និងប្រតិបត្តិការ ហើយមិនបានបាត់បង់ខ្សែច្រវាក់បញ្ជាការនោះទេ បើទោះបីជាមានការវាយប្រហារដោយអ៊ីស្រាអែលក៏ដោយ ដែលទីក្រុងមូស្គូបានលើកឡើងថា កំពុងព្យាយាមបង្កជម្លោះប្រដាប់អាវុធ នៅទូទាំងតំបន់មជ្ឈឹមបូព៌ា។

អ្នកនាំពាក្យក្រសួងការបរទេស លោកស្រី Maria Zakharova បានប្រាប់អ្នកសារព័ត៌មានថា៖ «យោងតាមការវាយតម្លៃរបស់យើង បានបង្ហាញថា ក្រុមហេសបូឡា ក្នុងនោះរួមទាំងអង្គភាពយោធាផងដែរ មិនបានបាត់បង់ខ្សែច្រវាក់បញ្ជាការរបស់ខ្លួននោះទេ ហើយកំពុងបង្ហាញឲ្យឃើញនូវក្រុមនេះ»។

លោកស្រី Zakharva បានបន្ថែមថា លោកខាងលិច ជាពិសេសសហរដ្ឋអាមេរិក និងអង់គ្លេស កំពុងបង្កើតឲ្យមានជម្លោះ នៅមជ្ឈឹមបូព៌ា និងបង្ហាញពីភាពលម្អៀង ដោយការគាំទ្រ ចំពោះអ៊ីស្រាអែល ដែលជាអ្នកធ្វើឲ្យជនស៊ីវិលស្លាប់ និងរបួសដ៏ច្រើន នៅប្រទេសលីបង់។ ហើយជាមួយគ្នានេះ ប្រទេសរុស្ស៊ីក៏បានថ្កោលទោសអ៊ីស្រាអែលផងដែរ ចំពោះការវាយប្រហារលើប្រទេសស៊ីរី។

គួរបញ្ជាក់ថា ក្រុមហេសបូឡាត្រូវបានបង្កើតឡើងដោយឆ្មាំបដិវត្តអ៊ីរ៉ង់ នៅដើមទសវត្សរ៍ឆ្នាំ១៩៨០ ដើម្បីប្រយុទ្ធប្រឆាំងនឹងអ៊ីស្រាអែល។ ក្រុមនេះក៏ជាចលនាសង្គមសាសនា និងនយោបាយដ៏សំខាន់ផងដែរ សម្រាប់ប្រជាជនមូស្លីមលីបង់និកាយស៊ីអីត៕