ក្រុមគ្រូពេទ្យប៉ាឡេស្ទីន បាននិយាយកាលពីថ្ងៃពុធ (០៩ តុលា) ថា មនុស្សយ៉ាងហោចណាស់ ៦០នាក់ ត្រូវបានសម្លាប់នៅក្នុងការវាយប្រហាររបស់យោធាអ៊ីស្រាអែល ទៅលើតំបន់ហ្កាហ្សា នៅថ្ងៃពុធ ខណៈកងកម្លាំងអ៊ីស្រាអែល បានបន្តការវាយឆ្មក់នៅភាគខាងជើងនៃតំបន់ហ៊ុមព័ទ្ធនេះ ជាទីដែលមន្ត្រីជំនួយរបស់អង្គការសហប្រជាជាតិ និយាយថា ភាពអត់ឃ្លានកំពុងរីករាលដាលម្តងទៀត។

យោធាអ៊ីស្រាអែលនិយាយថា ការវាយឆ្មក់ដែលឥឡូវនេះនៅក្នុងថ្ងៃទី៥ របស់ខ្លួន គឺមានបំណងបញ្ឈប់ក្រុមយុទ្ធជនហាម៉ាស មិនឱ្យចាប់ផ្តើមការវាយប្រហារបន្ថែមទៀតពីតំបន់ ចាបាលីយ៉ា (Jabalia) និងដើម្បីរារាំងពួកសកម្មប្រយុទ្ធមិនឱ្យប្រមូលផ្តុំគ្នាឡើងវិញ។ ការវាយប្រហារថ្មីនេះបានបន្តស្របពេលជម្លោះដ៏តានតឹងរបស់អ៊ីស្រាអែល ជាមួយក្រុមសកម្មប្រយុទ្ធ ហេសបូឡា នៅលីបង់ ហើយអ៊ីស្រាអែល ក៏គ្រោងនឹងសងសឹកចំពោះការវាយប្រហារដោយមីស៊ីលពីអ៊ីរ៉ង់ កាលពីសប្តាហ៍មុន។

អ៊ីស្រាអែល បានចេញបញ្ជាជម្លៀសម្តងហើយម្តងទៀតដល់ប្រជាជននៅ Jabalia និងតំបន់ក្បែរនោះ ប៉ុន្តែមន្ត្រីប៉ាឡេស្ទីន និងអង្គការសហប្រជាជាតិនិយាយថា ពុំមានកន្លែងសុវត្ថិភាពដើម្បីភៀសខ្លួនទេនៅក្នុងតំបន់ហ្កាហ្សាស្រ្ទីប។ លោក ហ្វីលីប ឡាហ្សារីនី (Philippe Lazzarini) ប្រធានទីភ្នាក់ងារជំនួយរបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីន UNRWA បានបង្ហោះនៅលើបណ្ដាញសង្គម X នៅថ្ងៃពុធថា “យ៉ាងហោចណាស់មនុស្ស ៤០០.០០០នាក់ កំពុងជាប់ខ្លួននៅក្នុងតំបន់ប្រយុទ្ធនោះ”។

ក្រសួងសុខាភិបាលហ្កាហ្សានិយាយថា កងទ័ពបានបញ្ជាឱ្យមន្ទីរពេទ្យចំនួន៣ នៅភាគខាងជើងហ្កាហ្សាជម្លៀសចេញ ហើយអ្នកជំងឺ និងគ្រូពេទ្យរាប់រយនាក់បានជាប់ខ្លួននៅខាងក្នុងកន្លែងទាំងនោះ។ យោធាអ៊ីស្រាអែលនិយាយថា ក្រុមសកម្មប្រយុទ្ធហាម៉ាស ប្រើប្រាស់តំបន់លំនៅដ្ឋានរបស់ហ្កាហ្សា ដែលមានប្រជាជនរស់នៅច្រើនក្រាស់ក្រែល រួមទាំងសាលារៀន និងមន្ទីរពេទ្យផងដែរ ដើម្បីបិទបាំងប្រតិបត្តិការខ្លួន ប៉ុន្តែក្រុមហាម៉ាស បដិសេធ៕