ក្នុងពេលដែលម៉ាឡេស៊ី ត្រៀមទទួលតំណែងជាប្រធានសមាគមប្រជាជាតិអាស៊ីអាគ្នេយ៍ (អាស៊ាន) នៅឆ្នាំ២០២៥ ការផ្លាស់ប្តូរគោលនយោបាយការបរទេសថ្មីៗរបស់ខ្លួនងាកទៅរកប្រទេសចិន និងរុស្ស៊ី អាចប្រែក្លាយទៅជាកិច្ចសហប្រតិបត្តិការកាន់តែសកម្មរវាងប្រទេសទាំងនេះ និងប្លុកក្នុងតំបន់។

ក្រុមអ្នកវិភាគបាននិយាយថា នេះអាចជំរុញឱ្យមានការព្រួយបារម្ភពីសមាជិកអាស៊ានមួយចំនួន និងសាកល្បងការរួបរួមរបស់ប្លុក ប៉ុន្តែទំនងជាមិនផ្លាស់ប្តូរភាពស្អិតរមួតរបស់ខ្លួននោះទេ។ ម៉ាឡេស៊ី ត្រូវបានគេរំពឹងថានឹងទទួលតំណែងជាប្រធានអាស៊ាន នៅចុងបញ្ចប់នៃកិច្ចប្រជុំកំពូលអាស៊ាន នៅទីក្រុងវៀងច័ន្ទន៍ នៅថ្ងៃសុក្រ (១១ តុលា) ដោយនាយករដ្ឋមន្ត្រីឡាវ នឹងផ្ទេរតំណែងប្រធានទៅឱ្យនាយករដ្ឋមន្ត្រីម៉ាឡេស៊ី។

សូមបញ្ជាក់ថា តំណែងប្រធានអាស៊ាន ត្រូវបានបង្វិលជារៀងរាល់ឆ្នាំក្នុងចំណោមរដ្ឋសមាជិកទាំង១០ តាមលំដាប់អក្ខរក្រម។

ក្រុមអ្នកជំនាញបាននិយាយថា ការធ្វើជាប្រធានរបស់ម៉ាឡេស៊ី ទំនងជាមិនផ្លាស់ប្តូរទិសដៅរបស់ប្លុកនេះច្រើនទេ ដោយសារដំណើរការធ្វើការសម្រេចចិត្តរបស់ខ្លួនផ្តល់ឥទ្ធិពលដល់ប្រធាន ប៉ុន្តែមិនមែនជាអំណាចដើម្បីធ្វើការសម្រេចចិត្តឯកតោភាគីនោះឡើយ។ 

ទោះជាយ៉ាងនេះក្ដី អ្នកវិភាគខ្លះនិយាយថា គោលនយោបាយការបរទេសរបស់ម៉ាឡេស៊ី ក្នុងការបន្តទំនាក់ទំនងកាន់តែជិតស្និតជាមួយក្រុមប្រទេស BRICS (ប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង) ដែលមានសេដ្ឋកិច្ចកំពុងរីកចម្រើន និងជំហរគាំទ្រប៉ាឡេស្ទីនដ៏ខ្លាំងក្លារបស់ខ្លួនស្របពេលជម្លោះដែលកំពុងបន្តនៅតំបន់ហ្កាហ្សា អាចសាកល្បងការរួបរួមក្នុងចំណោមប្រទេសសមាជិកអាស៊ាន។

ក្រោមភាពជាប្រធានរបស់ម៉ាឡេស៊ី ក្រុមអ្នកវិភាគក៏រំពឹងថា អាស៊ាននឹងចាត់វិធានការកាន់តែខ្លាំងលើវិបត្តិសិទ្ធិមនុស្សក្នុងសហភាពមីយ៉ាន់ម៉ា ក៏ដូចជាបង្កើនជម្លោះទឹកដីនៅសមុទ្រចិនខាងត្បូងជាមួយចិនផងដែរ៕