យោធាអ៊ីស្រាអែល បាននិយាយថាខ្លួនបានលុបបំបាត់សមាជិកក្រុម ហេសបូឡា ម្នាក់នៅក្នុងប្រទេសស៊ីរី ដែលបានបញ្ជូនព័ត៌មានស៊ើបការណ៍ប្រឆាំងនឹងអ៊ីស្រាអែល នៅតំបន់ខ្ពង់រាប ហ្កូឡាន់ (Golan Heights) ដែលកាន់កាប់ ខណៈប្រព័ន្ធផ្សព្វផ្សាយស៊ីរី រាយការណ៍នៅថ្ងៃព្រហស្បតិ៍ (១០ តុលា) នេះថា ការវាយប្រហារតាមអាកាសរបស់អ៊ីស្រាអែល បានត្រូវចំគោលដៅនៅស៊ីរី។

អ៊ីស្រាអែល បានធ្វើការវាយប្រហារប្រឆាំងនឹងគោលដៅដែលមានទំនាក់ទំនងជាមួយអ៊ីរ៉ង់ ក្នុងប្រទេសស៊ីរីអស់រយៈពេលជាច្រើនឆ្នាំមកហើយ និងបានបង្កើនការវាយឆ្មក់របស់ខ្លួនចាប់តាំងពីថ្ងៃទី០៧ ខែតុលា ឆ្នាំ២០២៣ មក ក្រោយការវាយប្រហាររបស់ក្រុមហាម៉ាស នៅលើទឹកដីអ៊ីស្រាអែល ដែលបញ្ឆេះសង្គ្រាមហ្កាហ្សា។

កងកម្លាំងការពារអ៊ីស្រាអែល បាននិយាយកាលពីថ្ងៃពុធថា ខ្លួនបានកម្ចាត់សមាជិកក្រុមហេសបូឡា ឈ្មោះ Adham Jahout ដែលជា “បណ្តាញភេរវករនៅតំបន់ Golan” នៅក្នុងការវាយប្រហារនៅស៊ីរី។ យោធាបញ្ជាក់ថា តួនាទីរបស់ Jahout គឺបញ្ជូនព័ត៌មានពីប្រភពស៊ីរី ទៅកាន់ក្រុមហេសបូឡា ដើម្បីជួយសម្រួលដល់ប្រតិបត្តិការប្រឆាំងនឹងអ៊ីស្រាអែល នៅតំបន់ Golan។

អ៊ីស្រាអែល បានបង្កើនការសងសឹករបស់ខ្លួនចំពោះការវាយប្រហាររបស់ក្រុមហាម៉ាស ហើយក៏បានបញ្ជូនកងទ័ពទៅកាន់លីបង់ និងវាយប្រហារតាមអាកាសលើអ៊ីរ៉ង់ យេម៉ែន និងស៊ីរី ក្នុងការតាមប្រមាញ់ក្រុមសកម្មប្រយុទ្ធដែលគាំទ្រដោយអ៊ីរ៉ង់ ដោយបង្កើនការភ័យខ្លាចនៃជម្លោះមជ្ឈិមបូព៌ាកាន់តែទូលំទូលាយដែលអាចទាក់ទាញអ៊ីរ៉ង់ និងសហរដ្ឋអាមេរិក៕