​ម៉ា​រ៉ា​តុង៖ កីឡាការិនី​កេ​ន​យ៉ា Joyciline Jepkosgei និង​កីឡាករ​អេ​ចូ​ពី Sisay Lemma បាន​ក្លាយ​ជា​ជើងឯក​ការប្រកួត​រត់​ម៉ា​រ៉ា​តុង​ទីក្រុង​ឡុង​ដ៍​កាលពី​ថ្ងៃអាទិត្យ​។ ​ការ​ប្រកួត​ផ្នែក​នារី កីឡាការិនី​កេ​ន​យ៉ា Joyciline Jepkosgei បាន​នាំ​មុខដាច់​គេ​មក​ដល់ទី​ព្រ័ត្រ​ដោយ​ប្រើ​ពេល ២ម៉ោង ១៧នាទី ៤៣វិនាទី​។ ​​លេខ២ ក្នុងការ​ប្រកួត​បាន​ទៅ​កីឡាការិនី​អេ​ចូ​ពី Deguti Azimeraw តាម​ពីក្រោយ ៥វិនាទី​ ខណៈ​អ្នក​លេខ៣ ក៏​ជា​កីឡាការិនី​អេ​ចូ​ពី​ដែរ Ashete Bekere ប្រើពេល ២ម៉ោង ១៨នាទី ១៨វិនាទី​។

​​នេះ​ជា​ជើងឯក​ក្នុង​ព្រឹត្តិការណ៍​ម៉ា​រ៉ា​តុង​កំរិត​ពិភពលោក​នេះ​ជា​លើក​ទី២ សំរាប់ Joyciline Jepkosgei បន្ទាប់ពី​នាង​ក៏​ធ្លាប់​ឈ្នះ​ការប្រកួត​ម៉ា​រ៉ា​តុង​នៅ​ទីក្រុង​ញូយ៉ក​សហរដ្ឋអាមេរិក​ដែរ​កាលពី​ឆ្នាំ២០១៩​។ ​​ងាក​មក​ការប្រកួត​ផ្នែក​បុរស​ អត្ត​ព​លិ​ក​អេ​ចូ​ពី Sisay Lemma បាន​ក្លាយជា​ជើងឯក​ក្រោយមក​ដល់ទី​ព្រ័ត្រ​មុនគេប្រើពេល ២ម៉ោង ៤នាទី ១វិនាទី​យកឈ្នះ​អ្នក​លេខ២ កីឡាករ​កេ​ន​យ៉ា Vincent Kipchumba យឺត​ជាង ២៧វិនាទី និង​លេខ៣ កីឡាករ​អេ​ចូ​ពី Mosinet Geremew យឺត​ជាង ៤០វិនាទី​។

​​រំលឹកថា ​កាលពី​ម៉ា​រ៉ា​តុង​ទីក្រុង​ឡុង​ដ៍​ឆ្នាំ២០២០ Sisay Lemma បានបញ្ចប់​ត្រឹម​លំដាប់​លេខ៣​។ ​ចំណែក​ការប្រកួត​សំរាប់​ជនពិការ​ដោយ​ប្រើ​រទេះរុញ ទាំង​ផ្នែក​នារី​ និង​បុរស​អ្នកឈ្នះ​សុទ្ធតែជា​អត្ត​ពលិកម​ក​ពី​ប្រទេស​ស្វ៊ី​ស​ រួមមាន​កីឡាករ Marcel Hug និង​កីឡាការិនី Manuela Schar៕

​អត្ថបទ​៖​នាង សុភា​វុ​ធ