ប្រទេសកូរ៉េខាងត្បូង ត្រូវបានបោះឆ្នោតជ្រើសរើសជាសមាជិករបស់ក្រុមប្រឹក្សាសិទ្ធិមនុស្សអង្គការសហប្រជាជាតិ (UNHRC) សម្រាប់អាណត្តិឆ្នាំ២០២៥-២០២៧ កាលពីថ្ងៃពុធ (ទី៩ ខែតុលា) ខណៈទីក្រុងសេអ៊ូលប្រឹងប្រែងចូលរួមយ៉ាងសកម្ម នៅក្នុងកិច្ចខិតខំប្រឹងប្រែងអន្តរជាតិ ដើម្បីដោះស្រាយបញ្ហាកូរ៉េខាងជើង និងបញ្ហាសិទ្ធិមនុស្សផ្សេងទៀត។

មហាសន្និបាតអង្គការសហប្រជាជាតិ (UN) បានបោះឆ្នោតជ្រើសរើសកូរ៉េខាងត្បូងឲ្យចូលរួមក្នុងក្រុមប្រឹក្សាមានសមាជិកចំនួន ៤៧ប្រទេស ដែលនេះការទទួលបានតួនាទីជាលើកទី៦ នៅក្នុងការបោះឆ្នោតដោយផ្ទាល់ និងសម្ងាត់ នៅឯទីស្នាក់ការកណ្តាលរបស់ UN ក្នុងទីក្រុង New York សហរដ្ឋអាមេរិក។ ប្រទេសនេះបានបម្រើការនៅក្រុមប្រឹក្សានេះ ពីឆ្នាំ២០០៦-២០០៨ ឆ្នាំ២០០៨-២០១១ ឆ្នាំ២០១៣-២០១៥ ឆ្នាំ២០១៦-២០១៨ និងឆ្នាំ២០២០-២០២២។

ជាមួយនឹងការបោះឆ្នោត នៅ UNHRC កាលថ្ងៃពុធ កូរ៉េខាងត្បូងក៏នឹងមានតួនាទីក្នុងពេលដំណាលគ្នាផងដែរ នៅឯស្ថាប័នសំខាន់ៗចំនួន ៣ របស់ UN ដែលរួមមានក្រុមប្រឹក្សាសន្តិសុខ ហើយនិងក្រុមប្រឹក្សាសេដ្ឋកិច្ច និងសង្គម។

ក្រសួងការបរទេសរបស់ទីក្រុងសេអ៊ូល បានលើកឡើងថា ការបោះឆ្នោតនេះបានឆ្លុះបញ្ចាំងពីការខិតខំប្រឹងប្រែងរបស់ខ្លួន ក្នុងការលើកកម្ពស់សិទ្ធិមនុស្ស ទាំងនៅក្នុងប្រទេស និងក្រៅប្រទេស ហើយជាលទ្ធផលដែលចេញមកពីទំនាក់ទំនងការទូត «ដ៏សកម្ម» និង «ទូទាំងក្រុមប្រឹក្សា»៕