មណ្ឌលគិរី៖ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានថ្លែងថា ក្រោយពីបញ្ចប់ការវាស់វែងដីធ្លី ក្រសួងនឹងរៀបចំប្លង់គោល ក្នុងការអភិវឌ្ឍខេត្តមណ្ឌលគិរី ទៅលើវិស័យសក្ដានុពល មានកសិកម្ម និងទេសចរណ៍ ។

 ក្នុងកិច្ចប្រជុំជំរុញការងារចុះបញ្ជីដីធ្លី ក្នុងភូមិសាស្ត្រខេត្តមណ្ឌលគិរី កាលពីថ្ងៃទី១០ ខែតុលា ឆ្នាំ២០២៤ ឯកឧត្តមឧបនាយករដ្ឋមន្ត្រី មានប្រសាសន៍ថា ក្រសួងរៀបចំដែនដី បាននិងកំពុងឆ្លើយតបទៅនឹងបំណងប្រាថ្នាដ៏ពិសិដ្ឋ របស់ប្រមុខរាជរដ្ឋាភិបាលកម្ពុជា ដែលបានដាក់ចេញនូវគោលការណ៍ និងទស្សនៈវិស័យក្នុងវិស័យរៀបចំដែនដី នគរូបនីយកម្ម និងសំណង់ សម្រាប់ប្រជាជាតិកម្ពុជា ដោយធ្វើយ៉ាងណាជំរុញការងារចុះបញ្ជីដីធ្លីបង្ហើយ ឱ្យបានចប់សព្វគ្រប់ រៀបចំទីក្រុង ទីប្រជុំជនឱ្យបានល្អ ក្លាយជាភូមិឋានក្សេមក្សាន្ត និងផ្ដល់ទ្រនំសុភមង្គលសម្រាប់ប្រជាពលរដ្ឋគ្រប់រូប ។

 ឯកឧត្តមបន្តថា ដោយឡែកខេត្តមណ្ឌលគិរី គឺជាខេត្តដ៏មានសក្ដានុពលមួយ លើវិស័យកសិកម្ម និងវិស័យទេសចរណ៍ ដូចនេះបន្ទាប់ពីការវាស់វែងដីធ្លីចប់រួចរាល់ ក្រសួងរៀបចំដែនដីនឹងខិតខំរៀបចំប្លង់គោល ក្នុងការអភិវឌ្ឍខេត្តមួយនេះ ឲ្យកាន់តែមានសក្ដានុពលបន្ថែមទៀត លើវិស័យទាំងពីរខាងលើ ដើម្បីជំរុញកំណើនសេដ្ឋកិច្ចរបស់ប្រជាពលរដ្ឋ ។

ឯកឧត្តម សាយ សំអាល់ បានបន្ថែមថា ដើម្បីឲ្យកិច្ចការអភិវឌ្ឍនេះ អាចប្រព្រឹត្តទៅបានដោយរលូន គឺទាមទារឱ្យមានកិច្ចសហការពីគ្រប់ភាគីពាក់ព័ន្ធ រួមនិងអាជ្ញាធរដែនដី ទើបជំរុញឱ្យការងារចុះបញ្ជីដីធ្លីក្នុងខេត្តមណ្ឌលគិរី បានបញ្ចប់ដោយជោគជ័យ ជាប្រយោជន៍ងាយស្រួលក្នុងការរៀបចំខេត្ត ឲ្យបានល្អប្រសើរ ស្របតាមសក្តានុពលសេដ្ឋកិច្ចរបស់ខេត្ត ពីព្រោះមណ្ឌលគីរី ដែលជារបៀងសេដ្ឋកិច្ចមួយដ៏សំខាន់ និងមានសក្តានុពលទាំងកសិឧស្សាហកម្មនិងអេកូទេសចរណ៍ ។

នាឱកាសនោះ ឯកឧត្តមឧបនាយករដ្ឋមន្ត្រី បានកោតសរសើរ និងវាយតម្លៃខ្ពស់ចំពោះរដ្ឋបាលខេត្តមណ្ឌលគិរី ដែលបានសហការជាមួយមន្ទីររៀបចំដែនដី នគរូបនីយកម្ម សំណង់ និងសុរិយោដី ក្នុងការអនុវត្តកិច្ចការជាច្រើន ទាក់ទិននឹងការងារចុះបញ្ជីដីធ្លី ក្នុងភូមិសាស្ត្រខេត្តនេះ សង្ឃឹមថាកិច្ចការចុះបញ្ជីដីធ្លីនៅក្នុងខេត្តមណ្ឌលគិរី នឹងអាចបញ្ចប់រួចរាល់ជាស្ថាពរនាពេលឆាប់ៗខាងមុខនេះ ៕ អត្ថបទ បាន សុខរិទ្ធិ