ប្រធានាធិបតីហ្វីលីពីន លោក ហ្វឺឌីណាន ម៉ាកូស ជូនៀ (Ferdinand Marcos Jr) បានជំរុញបណ្ដាមេដឹកនាំអាស៊ីអាគ្នេយ៍ និងចិន នៅក្នុងកិច្ចប្រជុំកំពូលក្នុងតំបន់កាលពីថ្ងៃព្រហស្បតិ៍ (១០ តុលា) ពន្លឿនការចរចាជាបន្ទាន់លើក្រមប្រតិបត្តិសម្រាប់សមុទ្រចិនខាងត្បូង ខណៈបន្តចោទប្រកាន់ទីក្រុងប៉េកាំង ពីការយាយី និងការបំភិតបំភ័យនៅដែនសមុទ្រ។

ថ្លែងនៅប្រទេសឡាវ ទៅកាន់មេដឹកនាំនៃសមាគមប្រជាជាតិអាស៊ីអាគ្នេយ៍ (អាស៊ាន) និងលោកនាយករដ្ឋមន្ត្រីចិន លី ឈាង (Li Qiang) លោក Marcos បាននិយាយថា វឌ្ឍនភាពសំខាន់ៗគឺចាំបាច់ណាស់ ហើយគ្រប់ភាគីទាំងអស់ត្រូវតែ “បើកចំហដោយស្មោះស្ម័គ្រដើម្បីគ្រប់គ្រងការខ្វែងគំនិតគ្នាយ៉ាងធ្ងន់ធ្ងរ” និងកាត់បន្ថយភាពតានតឹង។

ប្រទេសចិន និងហ្វីលីពីន ដែលជាសម្ព័ន្ធមិត្តអាមេរិកមួយនេះ បានប្រឈមមុខដាក់គ្នាជាបន្តបន្ទាប់នៅជិតដែនទឹកជម្លោះក្នុងសមុទ្រចិនខាងត្បូង ដោយទីក្រុងម៉ានីល បានចោទប្រកាន់ឆ្មាំល្បាតឆ្នេរចិន ពីសកម្មភាពកម្រោល ហើយទីក្រុងប៉េកាំង ខឹងសម្បារចំពោះអ្វីដែលខ្លួនហៅថាការបង្កហេតុ និងការឈ្លានពានទឹកដីពីនាវាហ្វីលីពីន។

ទស្សនៈនៃក្រមប្រតិបត្តិដែនសមុទ្រនេះ ត្រូវបានព្រមព្រៀងគ្នាជាលើកដំបូងរវាងចិន និងអាស៊ាន ក្នុងឆ្នាំ២០០២ ប៉ុន្តែដំណើរការផ្លូវការនៃការបង្កើតមួយមិនបានចាប់ផ្តើមទេរហូតដល់ឆ្នាំ២០១៧។ ជាការឆ្លើយតបជុំវិញការលើកឡើងរបស់លោក Marcos អ្នកនាំពាក្យក្រសួងការបរទេសចិន លោកស្រី ម៉ៅ នីង (Mao Ning) និយាយថា ប្រទេសចិន បានប្តេជ្ញាចិត្តក្នុងការលើកកម្ពស់កិច្ចពិគ្រោះយោបល់លើក្រមប្រតិបត្តិ និង តែងតែប្រកាន់ជំហរលើការដោះស្រាយជម្លោះតាមរយៈការសន្ទនា៕