ខណៈព្រឹត្តិការណ៍ព្រះរាជពិធីបុណ្យអុំទូក បណ្តែតប្រទីប អកអំបុក និង​សំពះព្រះខែ​ឆ្នាំ​២០២៤​នេះ នឹងទាក់ទាញទេសចរជាតិ អន្តរជាតិមកទស្សនានៅរាជធានីភ្នំពេញច្រើន ក្រសួងទេសចរណ៍ និង​បណ្តាអាជីវកម្មពាក់ព័ន្ធនានា ក្នុងវិស័យទេសចរណ៍ បានបង្ហាញកិច្ចសហការគ្នាថា នឹងបង្កើន​ការ​ផ្តល់​សេវាបដិសណ្ឋារកិច្ចល្អជូន មិនតំឡើងថ្លៃសេវាកម្ម និងពង្រឹងគុណភាពសេវាកម្ម សុវត្ថិភាព​ល្អ​បំផុតជូនទេសចរជាតិអន្តរជាតិ។

ឯកឧត្តម តុប សុភ័ក រដ្ឋលេខាធិការ និងជាអ្នកនាំពាក្យក្រសួងទេសចរណ៍ ថ្លែងប្រាប់ BTV នៅថ្ងៃ​ទី១១ ខែតុលានេះថា នៅក្នុងព្រឹត្តិការណ៍ព្រះរាជពិធីបុណ្យអុំទូកឆ្នាំនេះ ក៏ដូចឆ្នាំកន្លងទៅដែរ ក្រសួង​ទេសចរណ៍​នឹងរៀបចំ​វេទិកា​សម្រាប់​ទទួល​ទេសចរ​អន្តរជាតិ​ចូលអង្គុយ​ទស្សនា​ការ​ប្រណាំង​ទូក និងមានការរៀបចំប្រទីបទេសចរណ៍ ហើយបន្ថែមលើការងារនេះ ក្រសួងក៏​បាន​ណែនាំ​ឲ្យ​មន្ទីរទេសចរណ៍ ក៏ដូចមូលដ្ឋានអាជីវកម្មនានា រួមគ្នាផ្សព្វផ្សាយ​កញ្ចប់​ទេសចរណ៍​ទស្សនា​បុណ្យ​អុំទូកទៅក្រៅប្រទេស និងសហការនាំគ្នាផ្តល់សេវាបដិសណ្ឋារកិច្ចល្អ គុណភាព សុវត្ថិភាព ផ្តល់ភាពកក់ក្តៅជូនភ្ញៀវ កុំដំឡើងថ្លៃស្នាក់នៅ ម្ហូបអាហារ និងថ្លៃសេវាកម្មនានាទៀត។

ឯកឧត្តម តុប សុភ័ក អ្នកនាំពាក្យក្រសួងទេសចរណ៍ ថ្លែងថា ក្រសួងបានណែនាំ​អាជ្ញាធរមូលដ្ឋាន និងអាជីវកម្មទេសចរណ៍ នាំគ្នាផ្តល់សេវាបដិសណ្ឋារកិច្ចឲ្យបានល្អ ក្នុងព្រះរាជពិធីបុណ្យអុំទូ​ក​នេះ​។ កុំតំឡើងថ្លៃស្នាក់នៅ និងថ្លៃសេវាកម្មនានាទៀត ហើយត្រូវផ្តល់សេវាឲ្យមានគុណភាព កក់ក្តៅ ទើប​អាចធនាទាក់ទាញទេសចរប្រកបដោយនិរន្តរភាព និងធ្វើឲ្យភ្ញៀវ​ជួយ​ផ្សព្វផ្សាយ​ល្អ​ពីកម្ពុជា​ថែមទៀត​។

នៅក្នុងព្រឹត្តិការណ៍ព្រះរាជបុណ្យអុំទូកខាងមុខនេះ បណ្តាមូលដ្ឋានអាជីវកម្ម​ក្នុង​វិស័យ​ទេសចរណ៍​នឹង​ឱកាសនេះផ្សព្វផ្សាយវិស័យទេសចរណ៍កម្ពុជា ផ្សព្វផ្សាយម្ហូបអាហារ ផលិតផល វប្បធម៌​ទេសចរណ៍ខ្មែរ ឲ្យបានល្អបំផុត ដើម្បីឲ្យទេសចរជាតិ អន្តរជាតិ ទទួលបាន​បទ​ពិសោធន៍​បែប​ប្រពៃណីវប្បធម៌ខ្មែរ ក្នុងឱកាសថ្ងៃបុណ្យអុំទូកនោះ ពិសេសគឺជំរុ​ញ​ឲ្យភ្ញៀវ​អន្តរជាតិ​មក​ទស្សនា​កម្ពុជា ម្តងហើយ មកទស្សនាកម្ពុជាម្តងទៀត។

សូមបញ្ជាក់ថា ព្រឹត្តិការណ៍ព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ៣ថ្ងៃ ឆ្នាំ២០២៣កន្លងទៅ ទូទាំងប្រទេស ទទួលបានទេសចរជាតិអន្តរជាតិដើរទស្សនាកម្សាន្តបានប្រមាណជាង៦លាននាក់ ហើយព្រឹត្តិការណ៍ព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែឆ្នាំ២០២៤ ដែលនឹងព្រឹត្តិទៅចាប់ពីថ្ងៃទី ១៤ ដល់ថ្ងៃទី១៦ ខែវិច្ឆិកានេះ ក្រសួងទេសចរណ៍រំពឹងទូទាំងប្រទេសនឹងទាក់ទាញទេសចរជាតិអន្តរជាតិដើរទស្សនាកើនលើសឆ្នាំ២០២៣ ក្នុងនោះទេសចរជាតិអន្តរជាតិ មកទស្សនារាជធានីភ្នំពេញនឹងកើនលើស៥លាននាក់៕អត្ថបទ ស៊ុម សុខជា