ប្រធានាធិបតីកូរ៉េខាងត្បូង លោក យូន សុកយ៉ូល ( Yoon Suk Yeol) និងនាយករដ្ឋមន្ត្រីថ្មីរបស់ជប៉ុន Shigeru Ishiba បានជួបប្រជុំលើកដំបូងក្នុងប្រទេសឡាវ កាលពីថ្ងៃព្រហស្បតិ៍ ហើយបានយល់ព្រមពង្រឹងកិច្ចសហប្រតិបត្តិការសន្តិសុខប្រឆាំងនឹងការគំរាមកំហែងរបស់កូរ៉េខាងជើង ចំពេលមានទំនាក់ទំនងយោធាកើនឡើងជាមួយប្រទេសរុស្ស៊ី។

លោក យូន និងលោក Ishiba បានជួបគ្នានៅខាងក្រៅកិច្ចប្រជុំកំពូលសមាគមប្រជាជាតិអាស៊ីអាគ្នេយ៍ ត្រឹមតែ ៩ថ្ងៃ បន្ទាប់ពីលោក Ishiba ចូលកាន់តំណែងជាមេដឹកនាំរបស់ប្រទេសជប៉ុន ស្របពេលទំនាក់ទំនងមានភាពប្រសើរឡើង ចាប់តាំងពីឆ្នាំមុន ដោយសារផ្នែកនៃទំនាក់ទំនងជិតស្និទ្ធរវាងលោក យូន និងអ្នកកាន់តំណែងមុនរបស់លោក Ishiba គឺលោក ហ្វូមី គីស៊ីដា( Fumio Kishida)។

ទីប្រឹក្សាសន្តិសុខជាតិរងទី១ លោក Kim Tae-hyo បានថ្លែងប្រាប់អ្នកយកព័ត៌មានថា៖«ពួកគេបានចែករំលែកការព្រួយបារម្ភអំពីការគំរាមកំហែងនុយក្លេអ៊ែរ និងមីស៊ីលរបស់កូរ៉េខាងជើង ក៏ដូចជាសកម្មភាពតាមអ៊ីនធឺណីតខុសច្បាប់ ដោយសង្កត់ធ្ងន់ថា សកម្មភាពទាំងនេះ គឺបំពានលើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ»។

លោក Kim Tae-hyo បានបន្ថែមថា៖«ពួកគេក៏បានចែករំលែកក្តីបារម្ភដែលថា កិច្ចសហប្រតិបត្តិការយោធារវាងរុស្ស៊ី និងកូរ៉េខាងជើង គឺខុសច្បាប់ដែលបង្កការគំរាមកំហែងដល់អាស៊ីឦសាន និងតំបន់ឥណ្ឌូប៉ាស៊ីហ្វិក ក៏ដូចជាសន្តិភាព និងស្ថិរភាពពិភពលោកដែរ»។