នាយករដ្ឋមន្ត្រីជប៉ុន លោក Shigeru Ishiba បានធានាជាថ្មីនូវការបន្តកិច្ចសហប្រតិប្តិការជាមួយសមាគមប្រជាជាតិអាស៊ីអាគ្នេយ៍ ឬអាស៊ាន (ASEAN) នៅក្នុងគោលនយោបាយការបរទេសរបស់ប្រទេសជប៉ុន ដោយការលើកឡើងនេះកើតមាន នៅថ្ងៃបង្ហាញខ្លួនការទូតរបស់លោកជាលើកដំបូង ដែលមានរយៈពេលត្រឹមតែ ៩ថ្ងៃ បន្ទាប់ពីឡើងកាន់តំណែង។

ដោយថ្លែងក្នុងសន្និសីទសារព័ត៌មាន កាលពីថ្ងៃសុក្រ (ទី១១ ខែតុលា) នៅចុងបញ្ចប់នៃដំណើរទស្សនកិច្ចរបស់លោកទៅកាន់ទីក្រុងវៀងចន្ទន៍ ប្រទេសឡាវ ដើម្បីចូលរួមកិច្ចប្រជុំកំពូលពាក់ព័ន្ធអាស៊ាន លោកបានសង្កត់ធ្ងន់ម្តងទៀតថា ទីក្រុងតូក្យូ នឹងនៅតែជា «ដៃគូដែលគួរឲ្យទុកចិត្តបំផុត» របស់ប្លុកនេះ។

ការធានានេះបានកើតឡើងបន្ទាប់ពីអ្នកជំនាញខាងយោធាវ័យ ៦៧ឆ្នាំ បានធ្វើឲ្យមានកង្វល់ផ្នែកការទូត នៅពេលកំពុងធ្វើយុទ្ធនាការ ដើម្បីបានដឹកនាំគណបក្សសេរីប្រជាធិបតេយ្យ (LDP) ដែលកំពុងកាន់អំណាច ដោយការបង្ហាញនូវគំនិតរបស់លោក ដើម្បីបង្កើតតាមបែបអាស៊ីនៃសម្ព័ន្ធភាពយោធារបស់អង្គការសន្ធិសញ្ញាអាត្លង់ទិកខាងជើង (NATO)។

សំណើ ដើម្បីឲ្យមានក្របខណ្ឌសន្តិសុខសមូហភាព នៅអាស៊ី ដែលមិនទទួលបានការស្វាគមន៍ខ្លាំង នៅក្នុងតំបន់នោះ មិនត្រូវបានលើកយកមកនិយាយសូម្បីតែម្តង អំឡុងកិច្ចប្រជុំកំពូលរយៈពេល ២ថ្ងៃនោះ។ ក្រុមអ្នកវិភាគនិយាយថា «Asian Nato» (ណាតូបែបអាស៊ី) នឹងនាំឲ្យមានការបែកបាក់គ្នា ហើយត្រូវបានគេមើលឃើញថា ជាការបង្កឲ្យកើតភាពតានតឹងជាមួយប្រទេសចិន ដែលនឹងផ្ទុយពីស្មារតីអព្យាក្រឹតភាពរបស់អាស៊ាន។

តែទោះជាយ៉ាងណាក្ដី សំណើនេះមិនទាន់រលាយបាត់ទាំងស្រុងនៅឡើយទេ ដោយលោក Ishiba និងរដ្ឋមន្ត្រីរបស់លោក បានពណ៌នាថា វាជា «បញ្ហាមួយ សម្រាប់ពេលអនាគត" ហើយលោកនាយករដ្ឋមន្រ្តី នៅក្នុងសន្និសីទសារព័ត៌មាន កាលពីថ្ងៃទី១១ ខែតុលា បានប្រាប់នៅក្នុងការឆ្លើយតបទៅនឹងសំណួរថា សំណើនេះតម្រូវឲ្យមានការជជែកដេញដោល និងការឯកភាពគ្នា នៅក្នុងរង្វង់គណបក្ស LDP៕