ប្រធានសភាអ៊ីរ៉ង់លោក Mohammad Baqer Qalibaf បានជួបជាមួយនាយករដ្ឋមន្ត្រីចាំផ្ទះលីបង់ លោក Najib Mikati ក្នុងទីក្រុង Beirut នៅថ្ងៃសៅរ៍ (ទី១២ ខែតុលា) នេះ។

លោក Qalibaf ត្រូវបានគេរំពឹងថា នឹងធ្វើសន្និសីទសារព័ត៌មានមួយ បន្ទាប់ពីបានជួបជាមួយប្រធានសភាលីបង់ លោក Nabih Berri បន្ទាប់មកដំណើរទស្សនកិច្ចទៅកាន់ស្ថានទូតអ៊ីរ៉ង់ នៅលីបង់ និងធ្វើការពិភាក្សាជាមួយសមាជិកសភា និងមេដឹកនាំគណបក្ស។

គួរបញ្ជាក់ថា មជ្ឈិមបូព៌ានៅតែស្ថិតក្នុងការប្រុងប្រយ័ត្នខ្ពស់ ដើម្បីត្រៀមទប់ទល់នឹងការកើនឡើងនូវភាពតានតឹងបន្ថែមទៀត ដោយរង់ចាំការឆ្លើយតបរបស់អ៊ីស្រាអែល ចំពោះការបាញ់មីស៊ីលយ៉ាងសន្ធាប់របស់អ៊ីរ៉ង់ កាលពីថ្ងៃទី១ ខែតុលា។

ជម្លោះរវាងអ៊ីស្រាអែល និងក្រុមសកម្មប្រយុទ្ធហេសបូឡា បានផ្ទុះឡើងកាលពី ១ឆ្នាំមុន នៅពេលដែលក្រុមគាំទ្រដោយអ៊ីរ៉ង់មួយនេះ បានចាប់ផ្តើមបាញ់គ្រាប់រ៉ូកែតទៅកាន់ភាគខាងជើងអ៊ីស្រាអែល ដើម្បីគាំទ្រក្រុមហាម៉ាស នៅពេលសង្រ្គាមហ្កាហ្សាផ្ទុះឡើងថ្មីៗ៕