អ្នកការទូតអ៊ឺរ៉ុប និងមន្ត្រីជាន់ខ្ពស់សហភាពអឺរ៉ុប ២រូប កាលពីថ្ងៃសុក្រ (ទី១១ ខែតុលា) បាននិយាយថា សហភាពអឺរ៉ុប (EU) ត្រូវបានរំពឹងថា នឹងដាក់ទណ្ឌកម្ម នៅថ្ងៃចន្ទសប្ដាហ៍ក្រោយ លើបុគ្គល និងអង្គការនានាដែលពាក់ព័ន្ធនឹងការផ្ទេរមីស៊ីលបាលីស្ទិករបស់អ៊ីរ៉ង់ទៅកាន់ប្រទេសរុស្ស៊ី។

រដ្ឋមន្ត្រីការបរទេសសហភាពអឺរ៉ុប នឹងអនុម័តទណ្ឌកម្មលើបុគ្គល និងអង្គការចំនួន ១៤ ជុំវិញការផ្ទេរនេះ ក្នុងនោះរួមទាំងក្រុមហ៊ុនអាកាសចរណ៍ និងក្រុមហ៊ុនផ្សេងទៀត។ នេះបើយោងតាមអ្នកការទូតម្នាក់ដែលនិយាយក្នុងលក្ខខណ្ឌមិនបញ្ចេញឈ្មោះ។

មន្ត្រីសហភាពអឺរ៉ុបមិនបានបង្ហាញអត្តសញ្ញាណក្រុមហ៊ុន ឬបុគ្គលនោះឡើយ។ អ្នកការទូតធ្លាប់បាននិយាយថា សហភាពអឺរ៉ុបកំពុងសម្លឹងមើលវិធានការដែលនឹងទប់ស្កាត់ប្រតិបត្តិការរបស់ក្រុមហ៊ុនអាកាសចរណ៍ជាតិIran Air។

គួរបញ្ជាក់ថា កាលពីខែមុន សហរដ្ឋអាមេរិក ដោយលើកឡើងពីការស៊ើបអង្កេតដែលខ្លួនត្រូវបានចែករំលែកជាមួយនឹងសម្ព័ន្ធមិត្ត បាននិយាយថា រុស្ស៊ីបានទទួលមីស៊ីលបាលីស្ទិកពីប្រទេសអ៊ីរ៉ង់ ដើម្បីយកទៅប្រើប្រាស់ក្នុងសង្គ្រាម នៅអ៊ុយក្រែន។ ភ្លាមៗ ទីក្រុងវ៉ាស៊ីនតោន បានដាក់ទណ្ឌកម្មលើនាវា និងក្រុមហ៊ុនដែលខ្លួនបាននិយាយថា មានពាក់ព័ន្ធនឹងការផ្ទេរអាវុធនេះ៕