ក្រសួងការពារជាតិរបស់ទីក្រុងប៉េកាំងបាននិយាយថា ប្រទេសចិននៅថ្ងៃចន្ទ ១៤ ខែតុលានេះបានធ្វើសមយុទ្ធយោធានៅជុំវិញកោះតៃវ៉ាន់ ដោយបានបញ្ជូនយន្តហោះ និងនាវាទៅឡោមព័ទ្ធកោះស្វ័យគ្រប់គ្រងមួយនេះ។

ទីក្រុងប៉េកាំងរក្សាវត្តមានយោធាស្ទើរតែរាល់ថ្ងៃនៅជុំវិញកោះតៃវ៉ាន់ ហើយសមយុទ្ធនៅថ្ងៃចន្ទនេះតំណាងឱ្យហ្គេមសង្គ្រាមទ្រង់ទ្រាយធំជុំទីបួនរបស់ខ្លួនក្នុងរយៈពេលពីរឆ្នាំកន្លងមកនេះ។

ក្រុងប៉េកាំងបាននិយាយថា សមយុទ្ធដែលមានឈ្មោះថា Joint Sword-2024B សាកល្បងសមត្ថភាពប្រតិបត្តិការរួមគ្នារបស់កងទ័ព។

លោក Li Xi អ្នកនាំពាក្យនៃទីបញ្ជាការភាគខាងកើតរបស់យោធាចិនបាននិយាយថា សមយុទ្ធនានាកំពុងប្រព្រឹត្តទៅនៅក្នុងតំបន់ភាគខាងជើង ភាគខាងត្បូង និងភាគខាងកើតនៃកោះតៃវ៉ាន់ ។

លោក Li បាននិយាយថា សមយុទ្ធនេះគឺផ្តោតទៅលើការល្បាតត្រៀមប្រយុទ្ធតាមដែនអាកាស និងសមុទ្រ ការបិទច្រកលើកំពង់ផែ និងតំបន់សំខាន់ៗ។

ពួកគេក៏បានអនុវត្ត ការវាយលុកលើគោលដៅដែនសមុទ្រ និងដីគោក និងការរឹបអូសរួមគ្នាដ៏ធំ។

ប្រទេសចិន កាលពីថ្ងៃព្រហស្បតិ៍ ១០ តុលា បានថ្កោលទោសវោហារសាស្ត្រមេដឹកនាំកោះតៃវ៉ាន់ លោក ឡៃ ឈីង-ទ័រ (Lai Ching-te)ចំពោះភាពរឹងរូសរបស់ខ្លួនលើឯករាជ្យភាពរបស់កោះនេះ ក្រោយលោកបានប្តេជ្ញាទប់ទល់នឹងការបញ្ចូលឧបសម្ព័ន្ធនៅក្នុងសុន្ទរកថានាឱកាសប្រារព្ធទិវាជាតិរបស់កោះស្វ័យគ្រប់គ្រងមួយនេះ៕