រដ្ឋមន្ត្រីការបរទេសអ៊ីរ៉ង់ លោក សេយ៉េដ អាបាស អារ៉ាកឈី (Seyyed Abbas Araghchi) បានព្រមានកាលពីថ្ងៃអាទិត្យ (១៣ តុលា) ថា សហរដ្ឋអាមេរិក នឹងបង្កគ្រោះថ្នាក់ដល់កងទ័ពរបស់ខ្លួន ដោយការដាក់ពង្រាយពួកគេទៅកាន់អ៊ីស្រាអែល ដើម្បីប្រតិបត្តិការប្រព័ន្ធការពារមីស៊ីលរបស់អាមេរិក។

ការលើកឡើងរបស់លោក Araghchi នៅលើប្រព័ន្ធផ្សព្វផ្សាយសង្គម បានធ្វើឡើងបន្ទាប់ពីរបាយការណ៍ដែលថា ទីក្រុងវ៉ាស៊ីនតោន បានសម្រេចបញ្ជូនប្រព័ន្ធការពារដែនអាកាសរយៈកម្ពស់ខ្ពស់មានសមត្ថភាពខ្លាំង ឬហៅថា ថាអាដ (THAAD) របស់ខ្លួនទៅកាន់អ៊ីស្រាអែល ដែលជាវិធានការមួយតម្រូវឱ្យបុគ្គលិកអាមេរិក ជាអ្នកគ្រប់គ្រងប្រព័ន្ធនេះ។

រដ្ឋមន្ត្រីអ៊ីរ៉ង់រូបនេះ បានចោទអាមេរិក ថាបានផ្តល់ “ជំនួយយោធាក្នុងកម្រិតមិនធ្លាប់មាន” ដល់អ៊ីស្រាអែល ដោយបានចែករំលែកតួលេខដែលបង្ហាញពីជំនួយយោធារបស់អាមេរិក ដល់អ៊ីស្រាអែល ឈានដល់ ១៧,៩ពាន់លានដុល្លារក្នុងឆ្នាំ២០២៤ ដែលជាកំណត់ត្រាដ៏ខ្ពស់មួយ។ លោកក៏បានគូសបញ្ជាក់ពីកិច្ចប្រឹងប្រែងរបស់អ៊ីរ៉ង់ ក្នុងការទប់ស្កាត់ជម្លោះក្នុងតំបន់កាន់តែទូលំទូលាយ ដោយបន្ថែមថា “អ៊ីរ៉ង់មិនមានបន្ទាត់ក្រហមទេ នៅពេលនិយាយអំពីការការពារប្រជាជន និងផលប្រយោជន៍របស់ខ្លួន”។

មន្ទីរបញ្ចកោណបានបញ្ជាក់កាលពីថ្ងៃសុក្រ សប្ដាហ៍មុនថា ខ្លួននឹងដាក់ពង្រាយប្រព័ន្ធ THAAD ទៅកាន់អ៊ីស្រាអែល ដើម្បីបង្កើនសមត្ថភាពការពារមីស៊ីល បន្ទាប់ពីការវាយប្រហាររបស់អ៊ីរ៉ង់។ គួររម្លឹកថា កាលពីថ្ងៃទី០១ ខែតុលា កងឆ្មាំបដិវត្តន៍អ៊ីស្លាមអ៊ីរ៉ង់ (IRGC) បានបាញ់មីស៊ីលប្រហែល ១៨០គ្រាប់ ទៅកាន់គោលដៅអ៊ីស្រាអែល។ ជាការឆ្លើយតប នាយករដ្ឋមន្ត្រីអ៊ីស្រាអែល លោក Benjamin Netanyahu បានព្រមានថា អ៊ីរ៉ង់បានធ្វើកំហុសឆ្គងយ៉ាងធ្ងន់ធ្ងរ ហើយបានសន្យាសងសឹក៕