ប្រព័ន្ធោ្សព្វផ្សាយកូរ៉េខាងជើង បានរាយការណ៍កាលពីថ្ងៃអាទិត្យ (១៣ តុលា) ដោយដកស្រង់ពីរដ្ឋាភិបាលថា អង្គភាពកាំភ្លើងធំរបស់កូរ៉េខាងជើង នៅជិតព្រំដែនជាមួយកូរ៉េខាងត្បូង ត្រូវបានបញ្ជាឱ្យត្រៀមលក្ខណៈបាញ់បំផ្លាញយានដ្រូន ដែលទីក្រុងព្យុងយ៉ាង និយាយថាបង្ហោះឆ្លងកាត់ព្រំដែន ដោយនេះជាការប៉ះទង្គិចចុងក្រោយបង្អស់រវាងអ្នកជិតខាងទាំងពីរ។

ក្រុមរត់គេចពីកូរ៉េខាងជើង និងសកម្មជនមួយចំនួននៅក្នុងប្រទេសកូរ៉េខាងត្បូង បានបង្ហោះកញ្ចប់ជំនួយទៅកាន់ប្រទេសផ្ដាច់ខ្លួនមួយនេះ ហើយទម្លាក់ខិត្តប័ណ្ណរិះគន់មេដឹកនាំកូរ៉េខាងជើង លោក គីម ជុងអ៊ុន។ ទីក្រុងព្យុងយ៉ាង បានបន្ទោសយោធាទីក្រុងសេអ៊ូល ចំពោះបញ្ហានេះ ហើយបានបង្ហោះបាឡុងសំរាមរាប់ពាន់គ្រឿងចូលទៅកូរ៉េខាងត្បូង ជាការសងសឹក។

ទីភ្នាក់ងារសារព័ត៌មានរដ្ឋកូរ៉េខាងជើង KCNA បានដកស្រង់សម្តីអ្នកនាំពាក្យក្រសួងការពារជាតិដោយនិយាយថា ទីក្រុងព្យុងយ៉ាង មើលឃើញនូវលទ្ធភាពខ្ពស់នៃយានដ្រូនបន្ថែមទៀតហោះហើរពីលើរដ្ឋធានី ដោយយោធាបានត្រៀមលក្ខណៈសម្រាប់គ្រប់សេណារីយ៉ូទាំងអស់ រួមទាំងជម្លោះផងដែរ។

កាលពីថ្ងៃទី១១ ខែតុលា កូរ៉េខាងជើង បានចោទកូរ៉េខាងត្បូង ថាបានបញ្ជូនយានដ្រូនចូលទៅក្នុងទីក្រុងព្យុងយ៉ាង ហើយនិយាយថា ការទន្រ្ទាននេះទាមទារឱ្យមានសកម្មភាពសងសឹក។ លោកស្រី គីម យ៉ូជុង (Kim Yo Jong) ដែលជាប្អូនស្រីដ៏មានឥទ្ធិពលរបស់លោក គីម ជុងអ៊ុន បានព្រមានទីក្រុងសេអ៊ូល ពី “គ្រោះមហន្តរាយដ៏អាក្រក់” ហើយបន្ទោសយោធាកូរ៉េខាងត្បូង ពីភាពបរាជ័យក្នុងការកំណត់អត្តសញ្ញាណយានដ្រូន ដែលបញ្ជូនដោយអង្គការក្រៅរដ្ឋាភិបាលឆ្លងកាត់ព្រំដែន៕