ទីក្រុងសេអ៊ូល នៅថ្ងៃចន្ទ (ទី១៤ ខែតុលា) បានប្រាប់ឲ្យដឹងថា កូរ៉េខាងជើងកំពុងត្រៀមរួចជាស្រេច ដើម្បីបំផ្ទុះផ្លូវឆ្លងកាត់ព្រំដែនដែលមានការប្រឈមមុខផ្នែកយោធាខ្លាំងបំផុត ជាមួយកូរ៉េខាងត្បូង ចំពេលមានសង្គ្រាមពាក្យសម្តីកាន់តែខ្លាំងឡើងៗ បន្ទាប់ពីកូរ៉េខាងជើងបានចោទប្រកាន់គូអរិរបស់ខ្លួនថា បានបញ្ជូនយានដ្រូនហោះពីលើរដ្ឋធានីព្យុងយ៉ាង។

អ្នកនាំពាក្យយោធាកូរ៉េខាងត្បូង បាននិយាយថា កងទ័ពកូរ៉េខាងជើងកំពុងធ្វើការក្រោមការបិទបាំង នៅលើផ្លូវខាងព្រំដែនរបស់ខ្លួន ក្បែរឆ្នេរសមុទ្រភាគខាងលិច និងខាងកើត ដែលទំនងជាការត្រៀមរៀបចំ ដើម្បីបំផ្ទុះផ្លូវ។

គួរបញ្ជាក់ថា ប្រព័ន្ធផ្សព្វផ្សាយរដ្ឋ KCNA បានរាយការណ៍ថា កាលពីសប្តាហ៍មុន កងទ័ពកូរ៉េខាងជើងបាននិយាយថា ខ្លួននឹងកាត់ផ្តាច់ផ្លូវ និងផ្លូវដែកទាំងស្រុង ដែលតភ្ជាប់ទៅកូរ៉េខាងត្បូង និងពង្រឹងតំបន់ នៅខាងព្រំដែនរបស់ខ្លួន។

ដោយឡែក កាលពីថ្ងៃទី១១ ខែតុលា កូរ៉េខាងជើងបានចោទប្រកាន់កូរ៉េខាងត្បូងថា បានបញ្ជូនយានដ្រូន ដើម្បីទម្លាក់ខិត្តប័ណ្ណប្រឆាំងកូរ៉េខាងជើងរាយប៉ាយយ៉ាងច្រើនសន្ធឹកសន្ធាប់ នៅទីក្រុងព្យុងយ៉ាង ដែលប្រទេសនេះហៅថា ជាការញុះញង់ផ្នែកនយោបាយ និងយោធាដែលអាចនាំឲ្យមានជម្លោះប្រដាប់អាវុធ។

តែនៅពេលឆ្លើយសំណួរ ដែលថា តើយោធា ឬជនស៊ីវិលកូរ៉េខាងត្បូង បានបញ្ជូនយានដ្រូនទៅដែរ ឬអត់នោះ អ្នកនាំពាក្យរបស់អគ្គសេនាធិការចម្រុះកូរ៉េខាងត្បូង លោក Lee Sung-jun នៅថ្ងៃទី១៤ ខែតុលានេះ បានបដិសេធការចោទប្រកាន់នេះ៕