ដោយដកស្រង់សម្តីពីមន្ត្រីដែលស្និទ្ធនឹងរដ្ឋាភិបាលអ៊ុយក្រែន សារព័ត៌មានអាល្លឺម៉ង់ Der Spiegel កាលពីថ្ងៃអាទិត្យ (ទី១៣ ខែតុលា) បានរាយការណ៍ថា រដ្ឋាភិបាលអ៊ុយក្រែនកំពុងពិចារណាជម្រើសបញ្ចប់សង្គ្រាមទ្រង់ទ្រាយធំរបស់រុស្ស៊ី ដែលនឹងពាក់ព័ន្ធដល់ការផ្អាកជាបណ្តោះអាសន្ននូវគោលដៅរបស់ខ្លួន ក្នុងការស្ដារឡើងវិញនូវបូរណភាពទឹកដីទាំងស្រុងរបស់អ៊ុយក្រែន។

បច្ចុប្បន្ន ដែនដីអ៊ុយក្រែនជាង ២០ភាគរយ ស្ថិតនៅក្រោមការគ្រប់គ្រងរបស់រុស្ស៊ី។ សសរស្តម្ភនៃរូបមន្តសន្តិភាពរបស់ប្រធានាធិបតី លោក Volodymyr Zelensky សម្រាប់អ៊ុយក្រែន មានពាក់ព័ន្ធនឹងការរំដោះឲ្យបានវិញទាំងស្រុងនូវដែនដីដែលត្រូវបានកាន់កាប់ទាំងអស់នោះ ហើយទីក្រុងគីវបាននិយាយម្តងហើយម្តងទៀតថា ខ្លួនមិនមានឆន្ទៈក្នុងការធ្វើសម្បទានដែនដីទៅឲ្យទីក្រុងមូស្គូនោះឡើយ។

ប៉ុន្តែមន្ត្រីដែលនិយាយក្នុងលក្ខខណ្ឌមិនបញ្ចេញឈ្មោះ បានប្រាប់សារព័ត៌មាន Der Spiegel ថា រដ្ឋាភិបាល ឥឡូវនេះ កំពុងធ្វើការពិភាក្សាយ៉ាងម៉ត់ចត់ អំពីការព្រមបោះបង់គោលបំណងនៃការស្ដារដែនដីទាំងស្រុងឡើងវិញនេះ។

តាមសេចក្ដីរាយការណ៍ ប្រភពនោះបាននិយាយថា៖ «យើងជឿថា ជ័យជម្នះត្រូវតែមានន័យថា ការចុះញ៉មដោយគ្មានលក្ខខណ្ឌ (របស់ប្រធានាធិបតីរុស្ស៊ី លោក Vladimir Putin)»។ ប្រភពនោះបានអះអាងបន្ថែមថា នេះគឺជា «ការយល់ឃើញខុស ដើម្បីទទួលជ័យជម្នះ» ដោយនិយាយថា កិច្ចព្រមព្រៀង ដើម្បីបញ្ចប់សង្គ្រាម នឹងមិនអាចទៅរួចទេ បើគ្មានសម្បទានខ្លះនោះ។

មន្ត្រីនោះបានប្រាប់សារព័ត៌មាន Der Spiegel ថា កត្តាដែលជំរុញឲ្យទីក្រុងគីវ ពិចារណាលើសម្បទានដែនដីនេះ រួមមានការរុលទៅមុខឥតឈប់ឈររបស់រុស្ស៊ី នៅភាគខាងកើតអ៊ុយក្រែន និងលទ្ធផលមិនច្បាស់លាស់នៃការបោះឆ្នោតប្រធានាធិបតីសហរដ្ឋអាមេរិក។ មន្ត្រីរូបនេះបានបញ្ជាក់ថា៖ «មិនថា ជាអ្នកណា (អតីតប្រធានាធិបតីអាមេរិកលោក Donald Trump ឬអនុប្រធានាធិបតី លោកស្រី Kamala Harris) នោះទេ ជនជាតិអាមេរិកនឹងដកខ្លួនបន្តិចម្តងៗ ប៉ុន្តែប្រាកដណាស់នឹងដកទាំងស្រុងតែម្ដង»៕