ប្រមុខកងរក្សាសន្តិភាពអង្គការសហប្រជាជាតិ បាននិយាយកាលពីថ្ងៃច័ន្ទទី១៤ ខែតុលាថា កងរក្សាសន្តិភាពរបស់អង្គការសហប្រជាជាតិនឹងស្នាក់នៅគ្រប់ទីតាំងទាំងអស់ក្នុងប្រទេសលីបង់ ទោះបីជាមានការអំពាវនាវពីសំណាក់អ៊ីស្រាអែលឱ្យផ្លាស់ប្តូរទីតាំងចេញក្នុងពេលមានការប្រយុទ្ធគ្នាកាន់តែខ្លាំងរវាងអ៊ីស្រាអែល និងក្រុមហេសបូឡា ដែលបានបណ្តាលឲ្យកងទ័ពមួកខៀវ៥នាក់រងរបួស។

នាយករដ្ឋមន្ត្រីអ៊ីស្រាអែល លោក Benjamin Netanyahu កាលពីថ្ងៃចន្ទ បានអំពាវនាវជាថ្មីម្តងទៀតឱ្យកងរក្សាសន្តិភាពនៅភាគខាងត្បូងប្រទេសលីបង់ ឲ្យផ្លាស់ទីតាំងចេញពីតំបន់មួយចំនួននៅជិតព្រំដែនអ៊ីស្រាអែលជាមួយប្រទេសលីបង់ និងបានទទូចថាវាជា «ការមិនពិតទាំងស្រុង» ដែលកងកម្លាំងអ៊ីស្រាអែល បានកំណត់គោលដៅលើកងកម្លាំងរក្សាសន្តិភាពរបស់អង្គការសហប្រជាជាតិ(UNIFIL)។ អ៊ីស្រាអែល បានប្រឈមមុខទៅនឹងការរិះគន់យ៉ាងខ្លាំងជុំវិញការធ្វើឲ្យរងរបួស និងការខូចខាត ដល់កងកម្លាំងរក្សាសន្តិភាពរបស់អង្គការសហប្រជាជាតិ ដែលត្រូវបានដាក់ពង្រាយនៅក្នុងប្រទេសលីបង់ ។

ប្រមុខកងរក្សាសន្តិភាពរបស់អង្គការសហប្រជាជាតិ លោក ហ្សង់ ភ្យែ ឡាក្វ័រ(Jean-Pierre Lacroix) បាននិយាយថា «ការសម្រេចចិត្តនេះ ត្រូវបានធ្វើឡើង ថា កងរក្សាសន្តិភាពរបស់អង្គការសហប្រជាជាតិ(UNIFIL) នឹងស្នាក់នៅគ្រប់ទីតាំងរបស់ខ្លួន ទោះបីជាមានការអំពាវនាវធ្វើឡើងដោយកងកម្លាំងការពារជាតិអ៊ីស្រាអែល ឱ្យដកចេញពីទីតាំងដែលនៅជិតខ្សែបន្ទាត់ខៀវក៏ដោយ។

លោកនិយាយថា សេចក្តីសម្រេចនេះនៅតែមាន ហើយផែនការក៏ត្រូវបានបញ្ជាក់កាលពីថ្ងៃចន្ទដោយអគ្គលេខាធិការសហប្រជាជាតិ លោក Antonio Guterres ផងដែរ។

ក្រុមប្រឹក្សាសន្តិសុខអង្គការសហប្រជាជាតិ បានសម្តែងការព្រួយបារម្ភយ៉ាងខ្លាំង បន្ទាប់ពីឧប្បត្តិហេតុដែលបានកើតឡើងបណ្តាលឲ្យបុគ្គលិករបស់ខ្លួន៥នាក់រងរបួស។