ក្រុមមនុស្សធម៌របស់អង្គការសហប្រជាជាតិបាននិយាយថា ជុំទី២ នៃយុទ្ធនាការចាក់វ៉ាក់សាំងជំងឺស្វិតដៃជើង បានចាប់ផ្តើមនៅភាគកណ្តាលនៃតំបន់ហ្កាហ្សាស្ទ្រីប កាលពីថ្ងៃចន្ទ (១៤ តុលា)។

ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បាននិយាយថា ក្នុងរយៈពេលតិចជាងពីរសប្តាហ៍ UNRWA ដែលជាទីភ្នាក់ងារជំនួយរបស់អង្គការសហប្រជាជាតិសម្រាប់ប៉ាឡេស្ទីន អង្គការសុខភាពពិភពលោក និងមូលនិធិកុមាររបស់អង្គការសហប្រជាជាតិ មានគោលបំណងចាក់វ៉ាក់សាំងកុមារប្រហែល ៥៩០.០០០នាក់ អាយុក្រោម ១០ឆ្នាំ ជាមួយនឹងការចាក់ដូសទី២ នៃវ៉ាក់សាំងបង្ការជំងឺស្វិតដៃជើង។

OCHA បន្ថែមថា “ដើម្បីចាក់វ៉ាក់សាំងកុមារឱ្យបានច្រើនតាមដែលអាចធ្វើទៅបាន ភាគីទាំងអស់ត្រូវតែគោរពការផ្អាកប្រយុទ្ធមនុស្សធម៌ក្នុងតំបន់”។ យុទ្ធនាការវ៉ាក់សាំងនេះធ្វើឡើងបន្ទាប់ពីជុំទីមួយ ដែលត្រូវបានអនុវត្តចាប់ពីថ្ងៃទី០១ ដល់ថ្ងៃទី១២ ខែកញ្ញា ដោយចាក់បានកុមារជាង ៥៥៩.០០០នាក់។

ដូចនិងជុំទីមួយដែរ ជុំទីពីរនេះនឹងមានបីដំណាក់កាល ដែលវគ្គនីមួយៗមានយុទ្ធនាការបីថ្ងៃ និងទុកពេលមួយថ្ងៃដើម្បីទៅទីតាំងផ្សេង។ អង្គការយូនីសេហ្វ បាននិយាយកាលពីសប្តាហ៍មុនថា ការផ្អាកប្រយុទ្ធមនុស្សធម៌នៅក្នុងសង្គ្រាមនៅតំបន់ហ្កាហ្សាស្ទ្រីប ត្រូវបានយល់ព្រមដើម្បីអនុញ្ញាតឱ្យមានការចាក់វ៉ាក់សាំងជំងឺស្វិតដៃជើងជុំទីពីរនោះ៕