ក្រុមហ៊ុនផលិតរថយន្តរបស់ចិន និងសហភាពអឺរ៉ុប បានជួបគ្នានៅឯពិព័រណ៍រថយន្តនៅទីក្រុងប៉ារីស ប្រទេសបារាំងកាលពីថ្ងៃចន្ទ ១៤ តុលា ខណៈភាពតានតឹងកំពុងកើនឡើងទន្ទឹមនឹងសហភាពអឺរ៉ុបត្រៀមដំឡើងពន្ធនាំចូលដ៏ខ្ពស់លើរថយន្តអគ្គិសនីផលិតនៅប្រទេសចិន ហើយឧស្សាហកម្មនេះកំពុងទប់ទល់ទៅនឹងតម្រូវការធ្លាក់ចុះ។

ព្រឹត្តិការណ៍ឆ្នាំនេះ ដែលជាពិព័រណ៍រថយន្តដ៏ធំបំផុតនៅអឺរ៉ុប លេចមុខឡើងចំពេលវេលាដ៏ក្ដៅគគុក។ក្រុមហ៊ុនផលិតរថយន្តអឺរ៉ុបដែលជួបការលំបាកដោយសារប្រាក់ចំណូលធ្លាក់ចុះ ត្រូវបង្ហាញថាពួកគេនៅតែស្ថិតក្នុងហ្គេមនេះ ខណៈបណ្ដាគូប្រជែងរបស់ចិនមានបំណងរក្សាការឈរជើងនៅក្នុងទីផ្សារពោពេញដោយការប្រកួតប្រជែង។

យោងតាមនាយកប្រតិបត្តិនៃកម្មវិធី Paris Auto Show លោក ស៊ើច ហ្គាចត់ (Serge Gachot) ម៉ាកយីហោរថយន្តល្បីៗរបស់ចិនចំនួន៩ រួមទាំង BYD និង Leapmotor កំពុងដាក់បង្ហាញម៉ូដែលចុងក្រោយបំផុតរបស់ខ្លួននៅក្នុងព្រឹត្តិការណ៍ឆ្នាំនេះ ។

គួររម្លឹកថាកាលពីដើមខែនេះ បណ្ដារដ្ឋជាសមាជិកសហភាពអឺរ៉ុបបានគាំទ្រតិចតួចលើការដំឡើងពន្ធនាំចូលលើរថយន្តអគ្គិសនី ផលិតដោយប្រទេសចិនរហូតដល់ ៤៥% ដែលមានន័យថា ជាការប្រឆាំងនឹងអ្វីដែលទីក្រុងព្រុចសែល និយាយថាជាការឧបត្ថម្ភធនមិនយុត្តិធម៌ពីទីក្រុងប៉េកាំងដល់ក្រុមហ៊ុនផលិតរបស់ចិន។ ទីក្រុងប៉េកាំងបដិសេធការប្រកួតប្រជែងមិនយុត្តិធម៌ ហើយបានគំរាមចាត់វិធានការឆ្លើយតបវិញនាពេលខាងមុខ៕