ក្នុងឱកាស អញ្ជើញជាអធិបតី ពិធីអបអរសាទរខួបអនុស្សាវរីយ៣០ឆ្នាំ នៃថ្ងៃបង្កើតកងពលតូចលេខ៧០ (១៥ តុលា ១៩៩៤-១៥ តុលា ២០២៤) នាព្រឹកថ្ងៃទី១៥ ខែតុលា ឆ្នាំ២០២៤នេះដែរសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ត្រូវគិតគូឱ្យបានសព្វគ្រប់ចំពោះសុខទុក្ខរបស់បងប្អូនកងទ័ព ជាពិសេសគិតគូរលើសម្ភារប្រើប្រាស់ ការហូបចុក និងប្រាក់បៀវត្សរបស់កងទ័ព។

ក្នុងឱកាសនោះ សម្ដេចធិបតី នាយករដ្ឋមន្រ្ដី បានអរគុណដល់ក្រសួងស្ថាប័នរដ្ឋបាលថ្នាក់​ក្រោមជាតិ​ជាពិសេសកងកម្លាំងប្រដាប់អាវុធ គ្រប់ប្រភេទ ​កងនគរបាលជាតិ កងរាជអាវុធហត្ថ កងទ័ព ដែលបានចូលរួមអនុវត្តយ៉ាងម៉ឺងម៉ាត់​នៅក្នុងការអនុវត្តច្បាប់ ដើម្បីថែរក្សានៅស្ថិរភាព សន្តិសុខជាតិរបស់កម្ពុជាមិនឲ្យបែកបាក់មិនឲ្យឈានទៅ​ដល់ការកើតសង្រ្គាម និងធានាបាន​នូវសុខសន្ដិភាព ស្ថិរភាពជូនប្រជាពលរដ្ឋ។

សម្ដេចធិបតី ហ៊ុន ម៉ាណែត មានប្រសាសន៍ថា ចាប់ពីតាំងពីថ្ងៃបង្កើត រហូតមកទល់បច្ចុប្បន្ន កងពលតូចលេខ៧០​ បានប្រឹងប្រែងព្យាយាម ជម្នះរាល់ឧបសគ្គ ក្នុងការបំពេញភារកិច្ច សម្រេច​បានស្នាដៃជាច្រើន ក្នុងការកសាង និងពង្រឹងអង្គភាពរបស់ខ្លួន ឱ្យបានរៀបរយ និងរីកចម្រើនរឹងមាំ​ជាលំដាប់ រួមចំណែក ក្នុងកិច្ចការពារបូរណភាពទឹកដី ​ការពារសន្តិសុខ សុវត្ថិភាពជូនសង្គមជាតិ បានល្អប្រសើរ។

សូមបញ្ជាក់ថា កងពលតូចលេខ៧០ បានយកចិត្តទុកដាក់ក្នុងការបណ្តុះបណ្តាល ធនធានមនុស្ស កសាងហេដ្ឋារចនាសម្ព័ន្ធ ​សិក្សាតាមប្រព័ន្ធ បច្ចេកវិទ្យាទំនើប និងខិតខំពង្រឹងពង្រីកទំនាក់ទំនង កិច្ចសហប្រតិបត្តិការជាមួយ​បណ្តាប្រទេសជាមិត្ត ព្រមទាំងបានកសាងទីលាន​ហ្វឹកហ្វឺន​កម្រិត​ថ្នាក់ជាតិ បានចូលរួមការពាររាជធានីភ្នំពេញ ឱ្យមានសុខសុវត្ថិភាព និងបំពេញភារកិច្ចជាច្រើន​ទៀតទទួលបានលទ្ធផលគួរជាទីមោទនៈ៕អត្ថបទ៖ វ៉ន ដារ៉ា