បណ្ដាប្រទេសអាស៊ីអាគ្នេយ៍ អាចនឹងមានភ្លៀងធ្លាក់ខ្លាំងជាងធម្មតាក្នុងប៉ុន្មានខែខាងមុខពោលគឺចុងឆ្នាំ២០២៤នេះ ដែលគំរាមបង្កការរំខានបន្ថែមទៀតដល់វិស័យកសិកម្ម ទេសចរណ៍ និងទិន្នផលឧស្សាហកម្ម នៅក្នុងតំបន់ដែលទើបរងការវាយប្រហារដោយព្យុះជាបន្តបន្ទាប់ក្នុងឆ្នាំនេះ។

ក្រុមព្យាករណ៍អាកាសធាតុ បានព្យាករពីស្ថានភាពសំណើមរាប់ចាប់ប្រទេសពីហ្វីលីពីន ទៅដល់វៀតណាម រហូតដល់ខែវិច្ឆិកា ភាគច្រើនមកពីការលេចចេញនៃបាតុភូត ឡានីញ៉ា (La Nina) ដែលបាតុភូតផ្លាស់ទីទឹកក្តៅឆ្ពោះទៅមហាសមុទ្រប៉ាស៊ីហ្វិកភាគខាងលិច និងនាំមកនូវភ្លៀងធ្លាក់កាន់តែច្រើនក្នុងតំបន់។

ភ្លៀងធ្លាក់កាន់តែខ្លាំងអាចរារាំងកិច្ចខិតខំប្រឹងប្រែងស្តារឡើងវិញនៅវៀតណាម ដែលនៅក្នុងខែកញ្ញា ត្រូវបានវាយប្រហារដោយព្យុះទីហ្វុង យ៉ាហ្គី (Yagi) ដែលជាព្យុះដ៏អាក្រក់បំផុតក្នុងរយៈពេលជាច្រើនទសវត្សរ៍។ ថៃ ដែលពឹងផ្អែកលើវិស័យទេសចរណ៍ កំពុងសម្លឹងមើលការចំណាយ ៣០ពាន់លានបាត (ជិត ៩០០លានដុល្លារអាមេរិក) ក្នុងការខូចខាតដោយសាររលកនៃទឹកជំនន់នៅភាគខាងជើង។

ហ្វីលីពីន ដែលមើលឃើញខ្យល់ព្យុះទីហ្វុងចំនួន៩ក្នុងមួយឆ្នាំៗ នៅតែកំពុងងើបឡើងវិញពីព្យុះដ៏កាចសាហាវជាច្រើនក្នុងប៉ុន្មានខែថ្មីៗនេះ រួមទាំងព្យុះហ្កែមី (Gaemi) ក្នុងខែកក្កដា ព្យុះយ៉ាហ្គី ក្នុងខែកញ្ញា និងព្យុះក្រាថ្សន (Krathon) ក្នុងខែតុលា។ សិង្ហបុរី បានចេញការប្រកាសអាសន្នទឹកជំនន់កាលពីថ្ងៃទី១៤ ខែតុលា ខណៈរយៈពេលអន្តរមូសុងបាននាំមកនូវភ្លៀងផ្គរ និងរន្ទះទៅកាន់ទីក្រុងរដ្ឋដ៏តូចមួយនេះ៕