នៅថ្ងៃអង្គារនេះ អ្នកនាំពាក្យអង្គការឃ្លាំមើលសមុទ្រអ្នកស្រី Giorgia

Linardi បានរិះគន់ការបញ្ជូនក្រុមដំបូងនៃជនអន្តោប្រវេន៍ទៅកាន់ប្រទេសអាល់បានី

តាមនាវាទាហានជើងទឹកមួយគ្រឿង ជាការអនុវត្តផែនការដ៏ចម្រូងចម្រាស់

ដើម្បីដំណើរការអ្នកស្វែងរកសិទ្ធិជ្រកកោនរាប់ម៉ឺននាក់នៅបរទេស ។

ថ្លែងពីកោះ Lampedusa របស់អ៊ីតាលី អ្នកស្រី Linardi

និយាយថា ផែនការរបស់អ៊ីតាលី-អាល់បានី គឺជាវិធីមួយ ដើម្បីគេចវេសពីទំនួលខុសត្រូវលើការសុំសិទ្ធិជ្រកកោន

។

អ្នកស្រីបន្តថា វាគឺជាការប៉ុនប៉ងមួយទៀត ដើម្បីធ្វើយោធូបនីយកម្មព្រំដែន និងផ្ទេរទំនួលខុសត្រូវសម្រាប់ការការពារមនុស្សដែលស្ថិតក្នុងដំណើរទៅកាន់រដ្ឋផ្សេងទៀត

ដើម្បីឲ្យប្រាកដថា ក្រសែភ្នែកប្រព័ន្ធយុត្តិធម៌ និងសង្គមស៊ីវិល មិនអាចតាមដានបានទៀតទេ

។

រដ្ឋាភិបាលរបស់លោកស្រីនាយករដ្ឋមន្រ្តី Giorgia Meloni បានបង្កើតមជ្ឈមណ្ឌលទទួលជនអន្តោប្រវេសន៍ ២កន្លែងនៅក្នុងប្រទេសអាល់បានី

នៅក្នុងកិច្ចព្រមព្រៀងដំបូងពាក់ព័ន្ធនឹងប្រទេសសមាជិកសហភាពអឺរ៉ុប(EU) ក្នុងការបង្វែរជនអន្តោប្រវេសន៍ទៅកាន់ប្រទេសមិនមែនជាសមាជិក EU ដែលជាកិច្ចខិតខំមួយដើម្បីរារាំងការមកដល់មិនទៀងទាត់ ។

នាវា Libra បានចាកចេញពីកោះ Lampedusa ជាមួយនឹងជនអន្តោប្រវេសន៍ប្រុសចំនួន ១៦នាក់

ដែលទើបសង្រ្គោះបាននៅក្នុងសមុទ្រកាលពីថ្ងៃអាទិត្យ

ហើយគ្រោងនឹងធ្វើដំណើរទៅដល់ប្រទេសអាល់បានីនៅព្រឹកថ្ងៃពុធស្អែកនេះ ។

ជនអន្តោប្រវេសន៍ ១០នាក់មកពីប្រទេសបង់ក្លាដែស និងជនអន្តោប្រវេសន៍ ៦នាក់ផ្សេងទៀត

មកពីប្រទេសអេហ្ស៊ីប ។

អ៊ីតាលី និយាយថា

មនុស្សប្រុសដែលមិនងាយរងគ្រោះ មកពីប្រទេសដែលចាត់ថ្នាក់ថាជាប្រទេសសុវត្ថិភាព

នឹងត្រូវបញ្ជូនទៅកាន់ប្រទេសអាល់បានី ៕