បាត់ដំបង ៖ បងប្អូនប្រជាពលរដ្ឋជិត៥០គ្រួសាររស់នៅជាយដែនកម្ពុជា-ថៃស្ថិតក្នុង ភូមិអូរចំបក់ ឃុំត្រាង ស្រុកកំរៀង ខេត្ដបាត់ដំបង កំពុងខ្វះខាតអគ្គិសនីប្រើប្រាស់ ខណៈបង្គោលភ្លើង និងខ្សែរភ្លើងបានរាយកាត់ដំបូលផ្ទះជិត៥ឆ្នាំហើយ ដោយអ្នករស់នៅភូមិខាងលើ និងភូមិខាងក្រោមបានទទួលភ្លើងប្រើប្រាស់គ្រប់គ្រាន់អត់តែកណ្ដាលភូមិ ហើយបងប្អូនប្រជាពលរដ្ឋមានការងឿងឆ្លល់ បានស្នើទៅអាជ្ញាធរ ស្រុក ឬខេត្តជួយពិនិត្យ និងដោះស្រាយជូនពួកគាត់ផងនោះ។

ប្រជាពលរដ្ឋនៅក្នុងភូមិអូរចំបក់បានឱ្យដឹងថា គ្រួសារដែលគ្មានអគ្គិសនីប្រើប្រាស់មានប្រមាណ ជិត៥០គ្រួសារ ដោយពួកគាត់ធ្លាប់បានស្នើរទៅកាន់លោកមេភូមិ និងក្រុមការងារដែលដើរយកប្រាក់ថ្លៃសេវាប្រើប្រាស់ជាច្រើនដងហើយតែគ្មានការឆ្លើយតបអ្វីឡើយ ហើយចំណែកប្រជាពលរដ្ឋរស់នៅភូមិខាងលើ និងភូមិខាងក្រោមគេមានអគ្គិសនីប្រើប្រាស់គ្រប់គ្រាន់ ខុសអ្វីតែប៉ុន្មានគ្រួសារនេះរស់នៅកណ្ដាលគេគ្មានអគ្គិសនីប្រើដូចគេដែរនោះ។ 

ប្រជាពលរដ្ឋបានលើកឡើងថា ពួកគាត់បានទៅស្នើរសុំដល់ភូមិ ឃុំជាច្រើនដង ហើយមេភូមិ មេឃុំ តែងតែឆ្លើយតបមកដដែលៗថាចាំជួយដោះស្រាយតែគ្មានលិទ្ធផលអ្វីសោះរហូតដល់បច្ចុប្បន្ននេះ។បងប្អូនប្រជាពលរដ្ឋបន្តថា ពួកគាត់ក៏ធ្លាប់ស្នើរផ្ទាល់ទៅកាន់ក្រុមការងារដែលតែងតែដើរប្រមូលប្រាក់ថ្លៃសេវាប្រើប្រាស់ជាច្រើនដងផងដែរ តែពួកក្រុមការងារសន្យាថាថ្ងៃនេះថ្ងៃនោះរហូតមកទល់ពេលនេះមិនទាន់បានឃើញផលអ្វីទេ ខណៈបង្គោលភ្លើងបានដាក់នៅលើដីរបស់ប្រជាពលរដ្ឋក្នុងភូមិ និងខ្សែរភ្លើងបានរាយកាត់លើដំបូលផ្ទះរយៈពេលជិត ៥ឆ្នាំមកហើយនោះ ។

ទាក់ទងនឹងបញ្ហាប្រជាពលរដ្ឋខ្វះខាតអគ្គិសនីប្រើប្រាស់នេះ លោក ទ្រី សុខឃឿន មេភូមិអូរចំបក់បានថ្លែងឱ្យដឹងថា លោកតែងតែទទួលបានសំណើរពីប្រជាពលរដ្ឋជាញឹកញាប់ពិតមែន ហើយលោកបានខិតខំស្វះស្វែងស្នើរទាំងផ្ទាល់ម៉ាត់ក្នុងកិច្ចប្រជុំ និងដាក់ស្នើរទៅកាន់ថ្នាក់លើផងដែរតែមិនមានការឆ្លើយតបអ្វីល្អសោះចំពោះបញ្ហាអគ្គិសនីនេះ ។ លោកមេភូមិបានបញ្ជាក់ទៀតថា «ចំពោះអគ្គិសនីប្រើប្រាស់នៅក្នុងភូមិអូរចំបក់នេះគឺក្រុមហ៊ុនរបស់លោក ស៊ីន ឃីម ជាអ្នកគ្រប់គ្រងដូចនេះហើយបញ្ហាជាក់ស្ដែងយ៉ាងណានោះមិនដឹងថាក្រុមហ៊ុនគិតដូចម្ដេចឡើយ »។

 យ៉ាងណាក៏ដោយបងប្អូនប្រជាពលរដ្ឋបានស្នើរយ៉ាងទទួចសុំឱ្យអាជ្ញាធរពាក់ព័ន្ធ ជាពិសេសអភិបាលខេត្តបាត់ដំបងតែម្តង សូមមេត្តាជួយដោះស្រាយបញ្ហាខ្វះខាតអគ្គិសនីប្រើប្រាស់នេះឱ្យបានឆាប់រហ័សផងដែរ ដោយសាររាល់ថ្ងៃគឺពិបាកនឹងរកកន្លែងបញ្ចូលអាគុយ ចំណែកអ្នកប្រើប្រាស់សូឡាព្រះអាទិត្យក៏ពិបាកខ្លាំងពេលមេឃស្រទុំគ្មានពន្លឺព្រះអាទិត្យជាដើមនោះ។

សូមបញ្ជាក់ថាកាលពីឆ្នាំ២០១៧ កន្លងទៅសម្ដេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាបានមានប្រសាសន៏ថា ការដោះស្រាយបញ្ហាទឹក និងអគ្គិសនីត្រូវដោះស្រាយឱ្យបានម៉ត់ចត់ ហើយទាំងក្រសួងឧស្សាហកម្ម និងសិប្បកម្ម ក៏ដូចជាអគ្គិសនីកម្ពុជា ក្រសួងរ៉ែ និងថាមពល តាមរយះក្រុមហ៊ុនអគ្គិសនី ត្រូវបន្តការខិតខំ តបណ្ដាញភ្លើង និងទឹកទៅតាមទីឆ្ងាយផងដែរ៕អត្ថបទ៖​បាន ចក់