ពោធិ៍សាត់៖ រថយន្តវះកាត់ចល័ត រួមនិងក្រុមគ្រូពេទ្យភ្នែកស្ម័គ្រចិត្តឯកឧត្ដម កែវ រតនៈ ដឹកនាំដោយឯកឧត្ដម ជិត ប៉ុណ្ណារ៉ា និងលោកជំទាវ យូ ស្រីលាភ នឹងធ្វើការចុះព្យាបាលវះកាត់បកភ្នែកនិងកន្ទុយថ្លែនភ្នែក ដោយឥតគិតប្រាក់ ជូនបងប្អូនប្រជាពលរដ្ឋក្នុងខេត្តពោធិ៍សាត់ ចាប់ពីថ្ងៃទី១៨ រហូតដល់ថ្ងៃទី២០ ខែតុលា ឆ្នាំ២០២៤ ។ កម្មវិធីព្យាបាលវះកាត់ភ្នែកនេះ នឹងរៀបចំធ្វើឡើងនៅបរិវេណទីស្នាក់ការគណបក្សប្រជាជនកម្ពុជាខេត្តពោធិ៍សាត់ នៅជាប់និងផ្លូវជាតិលេខ៥ សង្កាត់ព្រៃញី ក្រុងពោធិ៍សាត់ ក្រោមកិច្ចសហការសម្របសម្រួលដោយឯកឧត្តម ខូយ រីដា ប្រធានគណៈកម្មាធិការគណបក្សប្រជាជនកម្ពុជាខេត្តពោធិ៍សាត់ និងជាប្រធានក្រុមការងារគណបក្សចុះមូលដ្ឋានក្រុងពោធិ៍សាត់ ។

ឯកឧត្ដម ជិត ប៉ុណ្ណារ៉ា បានបញ្ជាក់ឱ្យដឹងថា ក្រុមគ្រូពេទ្យភ្នែកស្ម័គ្រចិត្តឯកឧត្ដម កែវ រតនៈ បានធ្វើការចុះមកផ្តល់សេវាពិនិត្យព្យាបាលភ្នែក ដោយឥតគិតប្រាក់ ជូនប្រជាពលរដ្ឋតាមបណ្តាក្រុង-ស្រុកនានាក្នុងខេត្តពោធិ៍សាត់ជាច្រើនលើកច្រើនសារ តាំងពីឆ្នាំ២០២៣ រហូតដល់បច្ចុប្បន្ននេះ គឺជាសកម្មភាពមនុស្សធម៌ ដែលបានផ្តួចផ្តើមឡើងដោយឯកឧត្តម កែវ រតនៈ ប្រធានក្រុមការងារគណបក្សប្រជាជនកម្ពុជាចុះជួយខេត្តពោធិ៍សាត់ ដែលជាការយកចិត្តទុកដាក់លើសុខមាភាពរបស់ប្រជាពលរដ្ឋក្នុងមូលដ្ឋានខេត្តពោធិ៍សាត់និងក្នុងគោលបំណងដើម្បីរួមចំណែកកាត់បន្ថយការចំណាយនិងការលំបាកនានារបស់ប្រជាពលរដ្ឋជាពិសេសប្រជាពលរដ្ឋដែលមានជីវភាពខ្សត់ខ្សោយ ។ ឯកឧត្ដម ជិត ប៉ុណ្ណារ៉ា បានបន្តថា ការចុះមកខេត្តពោធិ៍សាត់កន្លងមក គឺមានទាំងការពិនិត្យ ការព្យាបាលភ្នែក វាស់ភ្នែក វះកាត់បកភ្នែកនិងកន្ទុយថ្លែនភ្នែក ផ្តល់ថ្នាំភ្នែក និងផ្តល់វ៉ែនតាដោយឥតគិតប្រាក់ តែដោយសង្កេតនិងរកឃើញថាមានករណីត្រូវធ្វើការវៈកាត់ច្រើនដូចនេះកម្មវិធីនៅថ្ងៃ១៨ ដល់ថ្ងៃទី២០ ខែតុលាខាងមុខនេះគឺសម្រាប់តែការ វៈកាត់ព្យាបាលភ្នែក។

គួរឱ្យដឹងដែរថាក្នុងឆ្នាំ២០២៤នេះ ក្រុមគ្រូពេទ្យភ្នែកស្ម័គ្រចិត្តឯកឧត្តម កែវ រតនៈ ដឹកនាំដោយឯកឧត្ដម ជិត ប៉ុណ្ណារ៉ា និងលោកជំទាវ យូ ស្រីលាភ បានចុះមកខេត្តពោធិ៍សាត់ចំនួន៦លើក ដោយពិនិត្យព្យាលបាលភ្នែក ជូនប្រជាពលរដ្ឋបានប្រមាណ១៣៥០០នាក់ ហើយកាលពីឆ្នាំ២០២៣ ក្រុមគ្រូពេទ្យភ្នែកស្ម័គ្រចិត្តឯកឧត្តម កែវ រតនៈ បានចុះមកខេត្តពោធិ៍សាត់ចំនួន០៧លើក ដោយធ្វើការពិនិត្យព្យាបាលជូនប្រជាពលរដ្ឋប្រមាណជិត១ម៉ឺននាក់ ក្នុងនោះបានវៈកាត់ភ្នែកបានប្រមាណ២០០នាក់ ៕