ប្រព័ន្ធផ្សព្វផ្សាយក្នុងស្រុកបាននិយាយនៅថ្ងៃពុធ (១៦ តុលា) នេះថា បេក្ខនារីដែលឈរឈ្មោះនៅក្នុងការបោះឆ្នោតសកលរបស់ប្រទេសជប៉ុន ក្នុងខែនេះ មានចំនួនច្រើនបំផុតក្នុងកំណត់ត្រា បើទោះបីជាតួលេខនោះនៅតែមានចំនួនតិចជាងមួយភាគបួននៃបេក្ខជនក៏ដោយ។

នាយករដ្ឋមន្ត្រីថ្មី លោក Shigeru Ishiba កំពុងស្វះស្វែងបន្តអាណត្តិរបស់ខ្លួននៅក្នុងការបោះឆ្នោតថ្ងៃទី២៧ ខែតុលា ដោយរក្សាសំឡេងភាគច្រើនសម្រាប់គណបក្សប្រជាធិបតេយ្យសេរី (LDP) ដែលកំពុងកាន់អំណាច។

ប្រទេសជប៉ុន មិនដែលមាននាយករដ្ឋមន្ត្រីស្ត្រីទេ ហើយលោក Ishiba ទើបតែបានផ្តួលអ្នកនយោបាយស្រីដ៏លេចធ្លោម្នាក់ក្នុងចំណោមអ្នកនយោបាយជាតិនិយមដែលជាស្រ្តីជាច្រើនដើម្បីទទួលបានតំណែងនាយករដ្ឋមន្រ្តីក្នុងការបោះឆ្នោតរើសមេដឹកនាំគណបក្ស។ ប្រព័ន្ធផ្សព្វផ្សាយជប៉ុនបានរាយការណ៍ថា បេក្ខភាពសភាជាន់ទាបចំនួន ១,៣៤៤នាក់ ដែលបានចាប់ផ្តើមយុទ្ធនាការរបស់ពួកគេកាលពីថ្ងៃអង្គារ សម្រាប់អាសនៈទាំងអស់៤៦៥ រួមមានស្ត្រីចំនួន ៣១៤នាក់ ដែលជាកំណត់ត្រាមួយ។

យោងតាមសារព័ត៌មាន យ៉ូមីអ៊ូរិ (Yomiuri) សមាមាត្រនៃបេក្ខនារី ដែលប្រហែល ២៣% ជាតួលេខដ៏ខ្ពស់លើសកំណត់ត្រាពីមុនគឺ ២២៩នាក់ នៅក្នុងការបោះឆ្នោតសកលឆ្នាំ២០០៩។ របាយការណ៍បាននិយាយថា កិច្ចខិតខំប្រឹងប្រែងរបស់លោក Ishiba ក្នុងការលើកទឹកចិត្តឱ្យស្ត្រីឈរឈ្មោះបោះឆ្នោតគឺជាហេតុផលមួយនៅពីក្រោយការកើនឡើងនេះ។

មេដឹកនាំស្ត្រីនៅតែជារឿងដ៏កម្រនៅក្នុងអាជីវកម្ម និងនយោបាយរបស់ប្រទេសជប៉ុន ដែលបានជាប់ចំណាត់ថ្នាក់លេខ១១៨ ក្នុងចំណោម១៤៦ នៅក្នុងរបាយការណ៍គម្លាតយេនឌ័រសកល (GGG) របស់វេទិកាសេដ្ឋកិច្ចពិភពលោកឆ្នាំ២០២៤។ គណៈរដ្ឋមន្ត្រីចំនួន ២០នាក់របស់លោក Ishiba រួមបញ្ចូលស្ត្រីតែពីរនាក់ប៉ុណ្ណោះ៕