ចៅក្រមសហព័ន្ធនៅរដ្ឋកាលីហ្វ័រនីញ៉ា (California) បានសម្រេចកាលពីថ្ងៃអង្គារ (១៥ តុលា) ថា ក្រុមហ៊ុនមេរបស់បណ្ដាញសង្គម ហ្វេសប៊ុក (Facebook) ឈ្មោះ មេតា (Meta) ត្រូវតែប្រឈមមុខនឹងបណ្ដឹងពីបណ្ដារដ្ឋរបស់សហរដ្ឋអាមេរិក ដោយចោទប្រកាន់ថាក្រុមហ៊ុននេះបានបញ្ឆេះបញ្ហាសុខភាពផ្លូវចិត្តក្នុងចំណោមមនុស្សវ័យជំទង់ ដោយធ្វើឱ្យយុវជនញៀននឹងលេងបណ្ដាញសង្គម Facebook និង Instagram។

លោកស្រី វ៉ននេ ហ្គនហ្សាលេស រ៉ជើស៍ (Yvonne Gonzalez Rogers) ចៅក្រមប្រចាំតំបន់របស់អាមេរិកដែលមានមូលដ្ឋាននៅទីក្រុង អកលែន (Oakland) បានច្រានចោលសំណើរបស់ Meta ក្នុងការទាមទារឱ្យលុបចោលបណ្ដឹងដែលធ្វើឡើងដោយរដ្ឋជាច្រើន នៅក្នុងបណ្តឹងពីរដាច់ដោយឡែកពីគ្នា ដែលបានដាក់កាលពីឆ្នាំមុន ដែលមួយពាក់ព័ន្ធនឹងរដ្ឋជាង៣០ រួមមានរដ្ឋកាលីហ្វ័រនីញ៉ា និងញូវយ៉ក និងមួយទៀតដាក់ដោយរដ្ឋហ្វ្លរីដា (Florida)។

រដ្ឋទាំងនោះកំពុងស្វះស្វែងរកដីការបស់តុលាការប្រឆាំងនឹងការអនុវត្តអាជីវកម្មខុសច្បាប់របស់ Meta និងចង់បានសំណងការខូចខាតរូបិយវត្ថុដែលមិនបានបញ្ជាក់។

សំណុំរឿងរាប់រយករណីត្រូវបានប្តឹងដោយដើមបណ្តឹងផ្សេងៗគ្នាដែលចោទប្រកាន់ក្រុមហ៊ុនប្រព័ន្ធផ្សព្វផ្សាយសង្គមនេះ ពីការបង្កើតមុខងារដែលនាំឱ្យអ្នកប្រើប្រាស់វក់នឹងលេងបណ្ដាញសង្គម ហើយនាំឱ្យមានបញ្ហាសុខភាពដូចជាការថប់បារម្ភ ជំងឺធ្លាក់ទឹកចិត្ត និងបញ្ហាផ្លូវចិត្តផ្សេងទៀតក្នុងចំណោមមនុស្សវ័យជំទង់ និងការមិនព្រមានពីហានិភ័យដល់អ្នកប្រើប្រាស់៕