កោះតៃវ៉ាន់៖ មេដឹកនាំកោះតៃវ៉ាន់លោកស្រី Tsai Ing-wen បានបង្ហាញការប្តេជ្ញាចិត្តរបស់លោកស្រី ក្នុងការពង្រឹងសមត្ថភាពការពារជាតិនៅក្នុងសុន្ទរកថាមួយអំឡុងពេលប្រារព្ធទិវាជាតិ ១០ តុលា ដែលកោះតៃវ៉ាន់ចាត់ទុកថាជាថ្ងៃបង្កើតដែនដីរបស់ខ្លួន។ ពិធីនេះបានធ្វើឡើងកាលពីថ្ងៃអាទិត្យនៅមុខអគារការិយាល័យមេដឹកនាំនៅទីក្រុងតៃប៉ិ។
លោកស្រី Tsai បាននិយាយថា ការធ្វើសកម្មភាពយោធារបស់ចិននៅក្នុងតំបន់កំណត់អត្តសញ្ញាណ ការពារដែនអាកាសរបស់កោះតៃវ៉ាន់បានប៉ះពាល់យ៉ាងធ្ងន់ធ្ងរដល់ទាំងសន្តិសុខជាតិ ទាំងសុវត្ថិភាពអាកាសចរណ៍របស់យើង។ សំដៅលើទំនាក់ទំនងជាមួយទីក្រុងប៉េកាំង លោកស្រីបាននិយាយថា កោះតៃវ៉ាន់អំពាវនាវឱ្យរក្សាស្ថានភាពដូចដើមទាំងអស់ ហើយនឹងប្រឹងប្រែងឱ្យអស់ពីលទ្ធភាពដើម្បីការពារស្ថានភាពបច្ចុប្បន្នមិនឲ្យមានការផ្លាស់ប្ដូរជាឯកតោភាគីឡើយ។ លោកស្រីក៏បាននិយាយផងដែរថា យើងសង្ឃឹមថានឹងមានភាពធូរស្រាលសម្រាប់ទំនាក់ទំនងឆ្លងច្រកសមុទ្រ ហើយនឹងមិនធ្វើសកម្មភាពដោយខ្វះការពិចារណាឡើយ ប៉ុន្តែគួរតែគ្មានការបំភិតបំភ័យណាមួយឡើយ ហើយកោះតៃវ៉ាន់នឹងមិនទោទន់ ឬឱនចំពោះការដាក់សម្ពាធនោះទេ។
ក្បួនព្យុហយាត្រាមួយបានបង្ហាញអាវុធ រួមទាំងមីស៊ីលល្បឿនលឿនជាងសំឡេងរយៈចម្ងាយមធ្យម Hsiung Feng III ជាមីស៊ីលប្រឆាំងនាវាដែលបង្កើតឡើងដោយកោះតៃវ៉ាន់។ ក្រុមអាជ្ញាធរកោះតៃវ៉ាន់កំពុងពន្លឿនការអភិវឌ្ឍន៍ និងការផលិតទ្រង់ទ្រាយធំនៃមីស៊ីលរយៈចម្ងាយឆ្ងាយ ដើម្បីបង្កើនការទប់ទល់នឹងឥទ្ធិពលយោធារបស់ប្រទេសចិន៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
