នាយករដ្ឋមន្ត្រីអង់គ្លេស លោក Keir Starmer នៅថ្ងៃពុធ (ទី១៦ ខែតុលា) នេះ បាននិយាយថា ប្រទេសរបស់លោក និងបារាំង បានស្នើឲ្យមានកិច្ចប្រជុំបន្ទាន់មួយ នៅក្រុមប្រឹក្សាសន្តិសុខអង្គការសហប្រជាជាតិ (UNSC) ដើម្បីពិភាក្សាអំពីស្ថានភាពមនុស្សធម៌ នៅតំបន់ហ្កាហ្សា ហើយចក្រភពអង់គ្លេស កំពុងពិចារណាដាក់ទណ្ឌកម្មរដ្ឋមន្ត្រីអ៊ីស្រាអែល ២រូប។

សារព័ត៌មាន Reuters បានរាយការណ៍កាលពីដើមខែនេះថា ការផ្គត់ផ្គង់ស្បៀងអាហារដល់តំបន់ហ្កាហ្សា បានធ្លាក់ចុះយ៉ាងខ្លាំង ក្នុងប៉ុន្មានសប្តាហ៍ថ្មីៗនេះ បន្ទាប់ពីអាជ្ញាធរអ៊ីស្រាអែល បានដាក់ចេញនូវច្បាប់គយថ្មី ហើយសហរដ្ឋអាមេរិក បាននិយាយថា ស្ថានភាពមនុស្សធម៌ត្រូវតែល្អប្រសើរឡើង បើមិនដូច្នេះទេ អ៊ីស្រាអែលអាចប្រឈមនឹងការរឹតបន្តឹងដែលអាចកើតមាន ជុំវិញជំនួយយោធារបស់សហរដ្ឋអាមេរិក។

នៅពេលត្រូវបានសួរអំពីស្ថានភាព លោក Starmer បានប្រាប់សភាថា៖ «យើងកំពុងបន្តធ្វើការយ៉ាងទៀងទាត់ ជុំវិញបញ្ហានេះជាមួយដៃគូរបស់យើង។ តំបន់ហ្កាហ្សា មានតម្រូវការបន្ទាន់ផ្នែកជំនួយមនុស្សធម៌ជាយូរមកហើយ ហើយឥឡូវនេះ នៅតែមានស្ថានភាពធ្ងន់ធ្ងរដដែល ដែលតម្រូវឲ្យមានវិធានការបន្ទាន់»។

ជាមួយគ្នានេះ លោក Starmer ក៏បាននិយាយផងដែរថា ចក្រភពអង់គ្លេសកំពុងសម្លឹងមើលដល់ការដាក់ទណ្ឌកម្ម ចំពោះរដ្ឋមន្ត្រីហិរញ្ញវត្ថុអ៊ីស្រាអែល លោក Bezalel Smotrich និងរដ្ឋមន្ត្រីសន្តិសុខជាតិ លោក Itamar Ben-Gvir ជុំវិញការអត្ថាធិប្បាយរបស់ពួកគេ អំពីជម្លោះនេះ៕