នាព្រឹកថ្ងៃទី១៥ ខែតុលា ឆ្នាំ២០២៤ លោកជំទាវ ខេង សំវ៉ាដា អនុប្រធានគណៈកម្មការទី៧ នៃ​រដ្ឋសភា និង ឯកឧត្ដមបណ្ឌិត សម តារា អនុប្រធានគណៈកម្មការទី១ នៃរដ្ឋសភា បានអម ឯកឧត្តម អ៊ុច បូររិទ្ធ ប្រធានគណៈប្រតិភូកម្ពុជាជួបសម្តែងការគួរសមជាមួយ គណៈប្រតិភូ​នៃ​សាធារណ​រដ្ឋ​ប្រជាមានិតចិន ដឹកនាំដោយ ឯកឧត្តម Tian Xuejun អនុប្រធាន​គណៈកម្មាធិការ​អប់រំ វិទ្យាសាស្ត្រ វប្បធម៌ និងសុខាភិបាល និងបានជួបសម្តែងការគួរសមជាមួយ​គណៈ​ប្រតិភូ​ជប៉ុន ដឹកនាំដោយ ឯកឧត្តម YOSHII Akira សមាជិកសភាក្រុមប្រឹក្សាជប៉ុន ដើម្បី​ពង្រឹង​ទំនាក់​ទំនង​ទ្វេភាគី និងកិច្ចសហប្រតិបត្តិការក្នុងក្របខ័ណ្ឌការទូតសភា។

ក្រៅពីជំនួបសម្តែងការគួរសមទាំងពីរខាងលើនេះ លោកជំទាវ ខេង សំវ៉ាដា និង ឯកឧត្ដម​បណ្ឌិត សម តារា ក៏បានចូលរួមស្តាប់បទអន្តរាគមន៍របស់ប្រទេសជាសមាជិក មហាសន្និបាត​លើក​ទី១៤៩ នៃសហភាពអន្តរសភា ក្រោមប្រធានបទ «ការប្រើប្រាស់វិទ្យាសាស្ត្រ បច្ចេកវិជ្ជា និង​នវានុវត្តន៍ (STI) ដើម្បីអនាគតប្រកបដោយសន្តិភាព និងនិរន្តរភាព» ហើយលើស​ពីនោះ​គណៈ​ប្រតិភូ​ក៏​បានចូលរួមក្នុងការបោះឆ្នោតលើ បញ្ហាបន្ទាន់ (Emergency Items) ផងដែរ។

នៅរសៀលថ្ងៃដដែលនេះ ឯកឧត្តម សម តារា អនុប្រធានគណៈកម្មការទី១ នៃរដ្ឋសភា បាន​ចូល​រួម​កិច្ច​ប្រជុំគណៈកម្មាធិការអចិន្ត្រៃយ៍ស្តីពីការអភិវឌ្ឍប្រកបដោយចីរភាព ក្រោមប្រធានបទ ”យុទ្ធសាស្ត្រ​សភាដើម្បីកាត់បន្ថយផលប៉ះពាល់យូរអង្វែងនៃជម្លោះ រួមទាំងជម្លោះប្រដាប់អាវុធ លើការ​អភិវឌ្ឍប្រកប ដោយចីរភាព”។ នៅក្នុងកិច្ចប្រជុំ​នេះ​ ឯកឧត្តម បានធ្វើបទអន្តរាគមន៍ ដោយ​បាន​លើកឡើងពីផលប៉ះពាលជាសកលនៃជម្លោះប្រដាប់អាវុធ និងវាយតម្លៃខ្ពស់​ដល់​ការ​ដោះ​ស្រាយ​ដោយ​សន្តិវិធី។ ឯកឧត្តម ក៏បានគូសបញ្ជាក់អំពីបទពិសោធន៍របស់កម្ពុជា ក្នុងការ​បញ្ច​​ប់​សង្រ្គោមដោយប្រកបសន្តិវិធី និងបានដាក់ចេញនូវ «គោលនយោបាយឈ្នះឈ្នះ» របស់ សម្តេចអគ្គ​​មហាសេនាបតីតេជោ ហ៊ុន សែន ដែលបាននាំមកនូវសុខសន្តិភាព ការអភិវឌ្ឍសង្គម និង​ខឿន​សេដ្ឋកិច្ចបានល្អប្រសើរជាលំដាប់ ។ ដូចនេះ មានតែសន្តិភាពទេ ទើបអាច​សម្រេច​បាន​នូវ​ការ​អភិវឌ្ឍប្រកបដោយចីរភាពពេញលេញបាន៕