បុគ្គលិកយោធា និងនគរបាលរាប់សិបនាក់ បានតម្រង់ជួរយ៉ាងរៀបរយ ដោយលើកជ្រោងទង់ជាតិឥណ្ឌូណេស៊ីព័ណ៌ក្រហម-ស ក្នុងចម្ងាយ១គីឡូម៉ែត្រ នៅខាងលើក្បាលរបស់ពួកគេ នៅឯបង្គោលព្រំដែនរវាងប្រទេសឥណ្ឌូនេស៊ី និងប៉ាពួនូវ៉ែលហ្គីណេ ក្នុងទីក្រុង Jayapura។ ព្រះអាទិត្យដ៏ក្ដៅហែង មានកម្តៅ៣១អង្សាសេ ពុំមែនជាបញ្ហាសម្រាប់ពួកគេនោះទេ។

ទិវាឯករាជ្យរបស់ប្រទេសឥណ្ឌូនេស៊ី ត្រូវបានប្រារព្ធកាលពីថ្ងៃទី១៧ ខែសីហា ហើយពួកគេចង់លើកជ្រោងទង់ជាតិឱ្យខ្ពស់តាមដែលអាចធ្វើទៅបាន ដើម្បីបង្ហាញពីមោទនភាពជាតិរបស់ពួកគេ។ វាជាពេលវេលាដើម្បីអបអរអធិបតេយ្យភាពរបស់ប្រទេសឥណ្ឌូនេស៊ី និងសេរីភាពរយៈពេល៧៩ឆ្នាំ ខណៈកំពុងបំពេញការងាររបស់ពួកគេក្នុងការធានាបានសន្តិសុខ និងការការពារប្រទេស ដែលព្រំដែនរបស់ពួកគេងាយនឹងកើតមានឧក្រិដ្ឋកម្មឆ្លងដែន ដូចជាការរត់ពន្ធគ្រឿងញៀន និងអាវុធជាដើម។

ស្ត្រីម្នាក់ឈ្មោះ Rikha បាននិយាយថា នាងចង់ឱ្យមានមន្ត្រីបន្ថែមទៀតត្រូវបានដាក់ពង្រាយនៅតំបន់ភាគខាងកើតផុតរបស់ប្រទេសឥណ្ឌូនេស៊ី។ វាគួរតែត្រូវបានដាក់ពង្រាយបន្ថែមទៀត នូវចំនួនមន្ត្រីយោធា និងនគរបាល ព្រោះយោធា និងនគរបាល ជួយយើង និងការពារពួកយើងបាន។

បំណងប្រាថ្នារបស់នាងអាចនឹងក្លាយជាការពិតក្នុងពេលឆាប់ៗនេះ ខណៈរដ្ឋមន្ត្រីការពារជាតិ លោក Prabowo Subianto នឹងក្លាយជាប្រធានាធិបតីបន្ទាប់របស់ប្រទេសឥណ្ឌូនេស៊ី នៅថ្ងៃទី២០ខែតុលា ខាងមុខនេះ។ ឧត្តមសេនីយ៍ផ្កាយបួនដែលចូលនិវត្តន៍ នឹងត្រូវចូលកាន់តំណែងបន្តពីលោក Joko Widodo ឬ លោកJokowi ជាឈ្មោះដែលត្រូវបានគេស្គាល់ជាទូទៅ។

ក្រោមការដឹកនាំរបស់ លោក Prabowo បុគ្គលិកយោធាកាន់តែច្រើនបន្ថែមទៀតអាចត្រូវបានដាក់ពង្រាយនៅខេត្តប៉ាពួ ដែលបានក្លាយជាផ្នែករបស់ប្រទេសឥណ្ឌូនេស៊ីជាផ្លូវការក្នុងឆ្នាំ១៩៦៩ ហើយបានទទួលរងការបះបោរដោយផ្នែកក្នុងកម្រិតទាបជាញឹកញាប់ ចាប់តាំងពីពេលនោះមក។