បេក្ខជនប្រធានាធិបតីនៃបក្សសាធារណរដ្ឋ លោក Donald Trump កាលពីថ្ងៃពុធ (១៦ តុលា) បានបន្តប្រកាន់ជំហររបស់ខ្លួនចំពោះអះអាងមិនច្បាស់លាស់ដែលថា ជនអន្តោប្រវេសន៍នៅក្នុងរដ្ឋ អូហាយយ៉ូ (Ohio) កំពុងបរិភោគសត្វចិញ្ចឹមរបស់អ្នកស្រុក ដោយប្រាប់អ្នកបោះឆ្នោតឡាទីន ក្នុងអំឡុងយុទ្ធនាការមួយថា លោកគ្រាន់តែនិយាយអ្វីដែលត្រូវបានរាយការណ៍ប៉ុណ្ណោះ។

លោក Trump ក្នុងប៉ុន្មានសប្តាហ៍ថ្មីៗនេះ បានពង្រីកការអះអាងមិនពិតដែលថា ជនអន្តោប្រវេសន៍ហៃទីនៅទីក្រុង ស្រ្ពីងហ្វៀល (Springfield) រដ្ឋ អូហាយយ៉ូ (Ohio) កំពុងលួចសត្វចិញ្ចឹមរបស់អ្នកស្រុក ឬយកសត្វព្រៃពីឧទ្យានសម្រាប់ធ្វើជាអាហារ។ មិនមានរបាយការណ៍គួរឱ្យទុកចិត្តណាមួយដែលថាជនជាតិហៃទី បរិភោគសត្វចិញ្ចឹមនោះទេ ហើយមន្ត្រីនៅក្នុងរដ្ឋ Ohio រួមទាំងអ្នកសាធារណរដ្ឋផងដែរ បាននិយាយម្តងហើយម្តងទៀតថា រឿងនេះគឺមិនពិតឡើយ។

នៅក្នុងព្រឹត្តិការណ៍ជួបជុំយុទ្ធនាការមួយនៅទីក្រុង ម៉ៃអាមី (Miami) នៅពេលត្រូវបានសាកសួរថាតើលោកពិតជាជឿថាជនអន្តោប្រវេសន៍កំពុងបរិភោគសត្វចិញ្ចឹមមែនដែរឬទេ លោក Trump ឆ្លើយថា លោកគ្រាន់តែនិយាយអ្វីដែលត្រូវបានរាយការណ៍ប៉ុណ្ណោះ ដោយបន្ថែមថា “ពួកគេក៏បរិភោគរបស់ផ្សេងទៀតដែលមិនគួរបរិភោគផងដែរ”។

លោក Trump លើកឡើងថា “សារព័ត៌មានជាច្រើន” ក៏បានរាយការណ៍ពីការអះអាងនេះដែរ ដោយមិនបញ្ចេញឈ្មោះ ឬផ្តល់ព័ត៌មានលម្អិតណាមួយឡើយ។ លោក Trump ធ្លាប់បាននិយាយកាលពីមុនថាលោកនឹងនិរទេសជនអន្តោប្រវេសន៍ហៃទី យ៉ាងច្រើនចេញពីទីក្រុងរបស់រដ្ឋ Ohio ទោះបីជាពួកគេភាគច្រើនរស់នៅក្នុងសហរដ្ឋអាមេរិកដោយស្របច្បាប់ក៏ដោយ។ ទីក្រុងនេះ បានទទួលការគំរាមគ្រាប់បែកជាច្រើនដង ចាប់តាំងពីលោក Trump បានចាប់ផ្តើអះអាងឡើងវិញនូវការចោទប្រកាន់មិនពិតលើជនជាតិហៃទី៕