វ៉ូវីណាម៖ ឯកឧត្តម អ៊ូ រតនា ប្រធានសហព័ន្ធកីឡាវ៉ូវីណាមកម្ពុជា បាននាំយកនូវអំណោយមួយចំនួនឧបត្ថម្ភដល់មជ្ឈមណ្ឌលជាតិហ្វឹកហ្វឺនកីឡា ក៏ដូចជាក្រុមជម្រើសជាតិវ៉ូវីណាមកម្ពុជាដែលកំពុងធ្វើការបិទខ្ទប់ហ្វឹកហាត់ នៅពហុកីឡដ្ឋានជាតិមរតកតេជោកាលពីចុងសប្ដាហ៍កន្លងទៅ។
ថ្លែងប្រាប់ក្រុមការងារ BTV ឯកឧត្តម អ៊ូ រតនា បានឲ្យដឹងថា សម្រាប់អំណោយរបស់សហព័ន្ធកីឡាវ៉ូវីណាមកម្ពុជា ផ្ដល់ជូនមជ្ឈមណ្ឌលជាតិហ្វឹកហ្វឺនកីឡាគឺមានម៉ាស់ចំនួន ១២,៥០០ម៉ាស់ និងអាល់កុល ៩០លីត្រ ខណៈសម្ភារៈឧបត្ថម្ភដល់កីឡាករ-កីឡាការិនីជម្រើសជាតិរបស់ខ្លួនគឺមានម៉ាស៊ីនចម្រុះទឹកក្ដៅ-ទឹកត្រជាក់ មី និងភេសជ្ជៈមួយចំនួន។ ប្រធានសហព័ន្ធដដែលបានបញ្ជាក់ថា ទោះបីអំណោយនេះ មិនច្រើនក្ដីតែនេះជាទឹកចិត្តមួយរបស់សហព័ន្ធ ដើម្បីចូលរួមជាមួយរាជរដ្ឋាភិបាលដើម្បីទប់ស្កាត់ការរីករាលដាលជំងឺកូវីដ-១៩ ពិសេសអំឡុងពេលក្រុមជម្រើសជាតិកម្ពុជាកំពុងធ្វើការប្រមូលផ្ដុំហ្វឹកហាត់ នៅពហុកីឡដ្ឋានជាតិមរតកតេជោ ក្នុងនោះក៏មានក្រុមជម្រើសជាតិកីឡាវ៉ូវីណាមកម្ពុជាផងដែរ។
ទន្ទឹមជាមួយគ្នា ឯកឧត្តម អ៊ូ រតនា ក៏បានថ្លែងអំណរគុណចំពោះកីឡាករ-កីឡាការិនីទាំងអស់ដែលបានលះបង់នូវមនោសញ្ចេតនាផ្ទាល់ខ្លួន ដើម្បីបំពេញភារកិច្ចក្នុងនាមជម្រើសជាតិ ពិសេសឯកឧត្តមបានថ្លែងអំណរគុណរាជរដ្ឋាភិបាល ដែលអនុញ្ញាតឲ្យក្រុមជម្រើសជាតិ បានប្រមូលផ្ដុំឡើងវិញ ទោះជាការប្រមូលផ្ដុំលក្ខណៈបិទខ្ទប់ក៏ដោយដើម្បីវាស់ស្ទង់សមត្ថភាព និងបង្កើននូវបច្ចេកទេសត្រៀមការប្រកួតអន្ដរជាតិនានា ពិសេសដំណើរឆ្ពោះទៅស៊ីហ្គេមឆ្នាំ២២២ នៅវៀតណាម និងស៊ីហ្គេមឆ្នាំ២០២៣ នៅកម្ពុជាតែម្ដង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
