ស្នងការសហភាពអឺរ៉ុបទទួលបន្ទុកគ្រប់គ្រងវិបត្តិ លោក Janez Lenarcic បាននិយាយថា គ្មានប្រទេសណាមួយអាចប្រឈមនឹងការគំរាមកំហែងពីអាកាសធាតុធ្ងន់ធ្ងរតែឯកឯងបាននោះទេ ដោយលោកបានប្រាប់ប្រព័ន្ធផ្សព្វផ្សាយ CNA ក្នុងកម្មវិធី Asia Now នាថ្ងៃព្រហស្បតិ៍ (ទី១៧ ខែតុល) នេះថា សូម្បីប្រទេសដែលមានសមត្ថភាពឆ្លើយតបច្រើនក៏ដោយ ក៏ប្រទេសទាំងនោះដឹងថា ពួកគេនៅតែត្រូវការជំនួយយ៉ាងខ្លាំងពីប្រទេសដទៃដែរ។

ការលើកឡើងបែបនេះកើតមាន នៅពេលដែលសហភាពអឺរ៉ុប (EU) កំពុងសហការជាមួយសមាគមប្រជាជាតិអាស៊ីអាគ្នេយ៍ (អាស៊ាន) ដើម្បីប្រយុទ្ធប្រឆាំងនឹងការកើនឡើងការនូវគំរាមកំហែងពីគ្រោះមហន្តរាយទាក់ទងនឹងអាកាសធាតុ។ នៅថ្ងៃព្រហស្បតិ៍នេះ នាយកដ្ឋានការពារជនស៊ីវិល និងប្រតិបត្តិការជំនួយមនុស្សធម៌របស់ EU និងមជ្ឈមណ្ឌលសម្របសម្រួលអាស៊ាន សម្រាប់ជំនួយមនុស្សធម៌ ពាក់ព័ន្ធនឹងការគ្រប់គ្រងគ្រោះមហន្តរាយ បានចុះហត្ថលេខាលើកិច្ចព្រមព្រៀង ស្តីពីការគ្រប់គ្រងគ្រោះមហន្តរាយ។

លោក Lenarcic ដែលបានមានវត្តមានក្នុងពិធីចុះហត្ថលេខា នៅទីក្រុងហ្សាការតារបស់ឥណ្ឌូនេស៊ី បាននិយាយថា៖ «យើងឃើញពីការឆ្លើយតប ចំពោះបរិយាកាសថ្មីនេះ ពោលគឺចំពោះអ្វីដែលកើតមានជាក់ស្ដែង ដើម្បីឲ្យមានការពង្រឹងនូវសាមគ្គីភាព រវាងគ្នា និងគ្នា ក្នុងចំណោមរដ្ឋសមាជិកសហភាពអឺរ៉ុប ប៉ុន្តែក៏មានតំបន់ផ្សេងទៀត ដូចជាតំបន់អាស៊ីអាគ្នេយ៍នេះផងដែរ»។

លោកបានបន្ថែមថា៖ «យើងត្រូវពង្រឹងកិច្ចសហប្រតិបត្តិការ នៅថ្នាក់តំបន់ ក៏ដូចជារវាងតំបន់នានាផងដែរ ព្រោះយើងត្រូវប្រឈមមុខជាមួយវា (អាកាសធាតុធ្ងន់ធ្ងរ) គ្មាននរណា ឬគ្មានប្រទេសណាមួយ អាចប្រឈមនឹងស្ថានភាពជាក់ស្ដែងនេះដោយឯកឯងបាននោះទេ»។ 

គួរបញ្ជាក់ថា ព្រឹត្តិការណ៍អាកាសធាតុធ្ងន់ធ្ងរ កាន់តែកើតមានញឹកញាប់ជាងមុន ដោយសារបម្រែបម្រួលអាកាសធាតុ។ ទាំងតំបន់អឺរ៉ុប និងអាស៊ីអាគ្នេយ៍ ប្រឈមជាមួយគ្រោះធម្មជាតិកាន់តែច្រើនឡើង ដូចជាគ្រោះរញ្ជួយដី និងទឹកជំនន់ជាដើម៕