​បាល់ទាត់៖ ​ខ្សែប្រយុទ្ធ​ក្រុម​បិសាច​ក្រហម Manchester United, Cristiano Ronaldo បាន​ពន្លាត​កំណត់ត្រា​ពិភពលោក​ក្នុងនាម​ជា​កីឡាករ​ស៊ុត​បញ្ចូល​ទី​ច្រើនជាងគេ​ឱ្យ​ក្រុម​ជំរើសជាតិ​ឡើងដល់ ១១២​គ្រាប់​បន្ទាប់​រកបាន​មួយ​គ្រាប់​ក្នុង​ជ័យជំនះ​របស់​ព័រទុយហ្កាល់ ៣-០ លើ​កាតា​ក្នុងជំនួប​មិត្តភាព​អន្តរជាតិ​។

​​កីឡាករ​វ័យ ៣៦ឆ្នាំ​រូបនេះ​រកបាន​គ្រាប់​នាំមុខ​ឱ្យ​ព័រទុយហ្កាល់​នៅ​នាទី​ទី៣៧ មុនពេល​ដែល Jose Fonte និង Andre Silva រកបាន​ម្នាក់​មួយគ្រា​ប់​ដែរ​។ ​​នេះ​ជាការ​បង្ហាញខ្លួន​ឱ្យ​ក្រុម​ជំរើសជាតិ​ព័រទុយហ្កាល់​ប្រកួត​ទី ១៨១ ហើយដែល​មានន័យថា​ គេ​បាន​បំបែក​កំណត់ត្រា​របស់​ខ្សែការពារ​អេ​ស្ប៉ា​ញ Sergio Ramos ផងដែរ​ដែលជា​កីឡាករ​បង្ហាញខ្លួន​ឱ្យ​ក្រុម​ជំរើសជាតិ​បាន​ច្រើនជាងគេ​នៅ​តំបន់​អឺរ៉ុប​។ ​​Ronaldo ទើបតែ​បំបែក​កំណត់ត្រា​ស៊ុត​បញ្ចូល​ទី​ច្រើន​គ្រាប់​ជាងគេ​ឱ្យ​ក្រុម​ជំរើសជាតិ​កាលពី​ខែ​មុន លើ​កំណត់ត្រា​ចាស់​ដែល​កាន់កាប់​ដោយ​ខ្សែប្រយុទ្ធ​អ៊ីរ៉ង់ Ali Daei ១០៩គ្រាប់​។

​សូមបញ្ជាក់ថា ​ព័រទុយហ្កាល់​មិន​ឈរលើ​គេ​ទៀត​ទេ​ក្នុង​វគ្គ​ជំ​រុះ World Cup ក្នុង​ពូ​ល A នេះ​បន្ទាប់ពី​ស៊ែ​ប​ទើប​យកឈ្នះ​លុច​ហ្សាំ​បួរ ១-០ កាលពី​ថ្ងៃ​សៅរ៍ តែ​ព័រទុយហ្កាល់​នៅសល់​មួយ​ប្រកួត​ក្នុង​ដៃ​។​ ​​ក្រុម​ម្ចាស់ផ្ទះ World Cup ២០២២ កាតា​ស្ថិតក្នុង​ពូ​ល A នៃ​វគ្គ​ជំ​រុះ​នេះដែរ​តែ​មិន​រាប់​ពិន្ទុ​ឡើយ ពោលគឺ​រាល់​ក្រុម​ដែល​ជួប​កាតា​ចាត់ទុកជា​ការប្រកួត​មិត្តភាព​ប៉ុណ្ណោះ​៕

​​អត្ថបទ​៖​នាង សុភា​វុ​ធ