បេសកកម្មរបស់អង្គការសហប្រជាជាតិ នៅក្នុងប្រទេសអាហ្វហ្គានីស្ថាន បានអំពាវនាវកាលពីថ្ងៃព្រហស្បតិ៍ (១៧ តុលា) ឱ្យបើកការស៊ើបអង្កេតលើរបាយការណ៍ដែលថាជនអន្តោប្រវេសន៍អាហ្វហ្គានីស្ថាន មួយក្រុមធំ ត្រូវបានបាញ់សម្លាប់នៅព្រំដែនអាហ្វហ្គានីស្ថាន-អ៊ីរ៉ង់។

ប្រព័ន្ធផ្សព្វផ្សាយអាហ្វហ្គានីស្ថាន រួមទាំងសារព័ត៌មាន ថូឡូ ញូវស៍ (Tolo News) ដែលដកស្រង់សម្តីសាក្សី បាននិយាយថា ជនអន្តោប្រវេសន៍អាហ្វហ្គានីស្ថានជាង ២០០នាក់ ដែលបានចូលទៅអ៊ីរ៉ង់ដោយខុសច្បាប់ ត្រូវបានវាយប្រហារលើទឹកដីអ៊ីរ៉ង់ ហើយមនុស្សរាប់សិបនាក់បានស្លាប់ និងរងរបួស។

ឯកអគ្គរដ្ឋទូតអ៊ីរ៉ង់ប្រចាំអាហ្វហ្គានីស្ថាន លោក ហាសាន កាហ្សេមី កូមី (Hassan Kazemi Qomi) បានបដិសេធរបាយការណ៍នៃ “ការស្លាប់របស់ជនខុសច្បាប់រាប់សិបនាក់” នៅក្នុងការបង្ហោះនៅលើបណ្ដាញសង្គម X។ សារព័ត៌មាន Tolo News បានដកស្រង់សម្ដី “អង្គការសិទ្ធិមនុស្សអ៊ីរ៉ង់” ដោយនិយាយថា ឆ្មាំព្រំដែនអ៊ីរ៉ង់ បានវាយប្រហារជនអន្តោប្រវេសន៍ទាំងនោះ។

រដ្ឋបាលគ្រប់គ្រងដោយពួកតាលីបង់របស់អាហ្វហ្គានីស្ថាន មិនបានបញ្ជាក់ពីឧប្បត្តិហេតុនេះទេ ហើយបាននិយាយថាខ្លួនកំពុងស៊ើបអង្កេត។ ប្រជាជនអាហ្វហ្គានីស្ថានរាប់ពាន់នាក់បានភៀសខ្លួនចេញពីប្រទេសរបស់ពួកគេក្នុងឆ្នាំ២០២១ នៅពេលដែលពួកតាលីបង់ បានឡើងកាន់អំណាច បន្ទាប់ពីការដកកងកម្លាំងលោកខាងលិច ដែលដឹកនាំដោយសហរដ្ឋអាមេរិក ចេញពីជម្លោះរយៈពេល ២០ឆ្នាំ៕